Omunafikola mosekundofikola Iipumbu Secondary School mOshakati vati okwa yashwa mokuulu pefimbo a li ta kendabala okudenga omukeleli womaliko.
Oshiningwanima eshi osha ningwa mexuliloshivike mofikola Iipumbu efimbo loufiku.
Omupopiliko wopolifi moshitukulwa shaShana Inspector Thomas Aiyambo okwa hokolola ta ti nakuninga oshihakanwa okwa li a ya koshindingili shefiku lohole sha li mofikola yavo.
Vati ovanafikola okwa li tava futu N$10 pomuvelo kukeshe omunafikola a hala okuya mongulu omu mu na oshiindingili.
Otaku hokololwa kutya okamatyona oko oka ya meni lofikola keenghono dako, konima yokutukaela nokukupula omakeleli womaliko nomamanya.
Eshi oshiindingili sha pita mo okamatyona vati oka ya kolukanda nokukongolola ongudu youmatyona vakwao opo va ka denga omukeleli womaliko.
Vati ova tameka okuumba nomakende eebiila nomamanya osho sha eta opo omulumenhu oo e va umbe nondjebo.
Kamatyona vati nakutameka olwoodi okwa kwatwa nee koshikuti mokuulu.
Okwa twalwa koshipangelo nota ku hokololwa onghalo yaye i li xwepo.
fhamalwa@nepc.com.na