WINDHOEK Omunambelewa gomakondololo gokoongamba okwa tulwa miipandeko megumbo lyomukwanezimo lye moKatutura kaanambelewa yOkomisi yUulingilingi (Anti-Corruption Commission -ACC) mboka ya kala ye mu li mokashoko shi nasha nokufekelelwa iilonga yuulingilingi noombumbo. Aanambelewa yoACC oya kwata po omufekelwa Stephanus R. Owoseb, ngoka ta fekelelwa iilonga yuudhudhu wu nasha nokudhima mo omauyelele mookompiuta dhoshikondo shawo opo ehangano limwe lyokulanditha iiyimati li ende ponto okufuta iimaliwa pomuyelo gokoongamba, iifendela mbyoka hayi futwa komahangano ngoka haga eta mo iilandithomwa okuza pondje. Iiningwanima ayihe yi nasha niiyimati, iikwamboga niingumutulu ayihe oombyoka ohayi etwa moshilongo okuza koSouth Afrika, nuulingilingi mboka wa longwa po owa ningilwa owina okuyuga epangelo iimaliwa oomiliyuna. Owoseb, ngoka a kuthwa miilonga pakathimbo okwa li Omunambelewa Omukuluntu gOmakondololo gOkoongamba poNoordoewer, omuyelo omunene pokati kaNamibia nOmulonga gwaOrange. Shika osha etitha omufekelwa a pewe oombumbo dhokapandi kiimaliwa ya konda N$769 268, mbyoka ya tulwa koakaunta yoBank Windhoek ndjoka ya patululwa pakulongitha edhina nomaukwatya gokamatyona ke koomvula omulongo nambali. Konima sho eloli lye ya moshilongo nokweenda ookilometa omathele gwontumba okuza pomuyelo nokuhelula oondongelwa dhalyo, omweeti gwiiyimati moshilongo ngoka taku tiwa ehangano lyoDirk Fruit, Omukuluntuwiliki goACC, Paulus Noa ota ti ehangano ndyoka hali longo okuza pOsaka, aniwa olya tula oshimaliwa koakaunta ndjoka. Noa ta ti omunambelewa ngoka “okwa kala nokwiiyambapaleka yemwene,” okupitila mosikema yawo ndjoka ya li ya longekidhwa nawa sho a kala “nokupitika” oondongelwa dhiiyimati dhi etwe moshilongo kehangano ndyoka hali dhi fala koositola dhalyo kOshakati. Iimaliwa yomuyalu okuza N$1 000 sigo N$5 000 oya kala hayi tulwa koakaunta yokamatyona paempito dhayooloka kaantu inaya tseyika oshowo koDirk Fruit okutameka momumvo 2001 sho ehangano ndika lya deposita N$5 000 koakaunta ndjoka. Okuza omasiku 2 Januali 2002, iimaliwa hayi tulwa koakaunta oya tameke okwiindjipala okuza N$5 000 oshowo N$10 000 ga depositwa pashikando muKotoba omumvo tuu ngoka. Momasiku 18 Desemba 2003, ano oshiwike shimwe omanga Okrismesa inayi dhana eti 25 Desemba 2003, koakaunta ndjoka okwa depositwa okapandi koodola N$17 000, shoka sha talika ko kutya “omagano gOkili.” MuJanuali gomumvo 2002 sigo Desemba 2003, aantu mboka inaya tseyika noya deposita iimaliwa koakaunta ndjoka oya tula ko N$236 503, nomudepositi omunene pethimbo ndyoka oye Dirk Fruit. Aadepositi yamwe oyo ngaashi Amy Perkirs, A. Ruimin, S. Effender naSandra Jacobs goDirk Fruit, omanga oACC ya tumbula wo edhina Silvia Kapembe, oshowo Y.Abrahams, Gairoe Abrahams, A.Samsdien oshowo Toby. Okuza muJanuali 6, 2004 sigo eti 24 Desemba 2004, omunambelewa ngoka a kwatwa po okwa pewa oombumbo dhokapandi N$327 839 okuza koDirk Fruit. Noa okwa uvaneke kutya aanambelewa ye otaya ka longa nonyanya okukwata moshipala iilonga yuumbudhi oshowo iikulumuna, oshoka omiyonena dhika odhi li omutondi omunene gweliko lyoshilongo, ta ti “omaliko giilongo oyindji” osho ashike ga mbangolotithwa pamikalo dhoka. Omufekelwa okwa holoka nale mompangu yaMengestrata Tuyenikelao Haikango moKatutura mOmaandaha shi nasha niipotha mbyoka, noACC oye shi ulike kutya otayi ka tinda opo omufekelwa a pewe ombooloha. Etompelo olyo ndyoka kutya oACC otayi ti otashi vulika omufekelwa a ka ye mekwatathano noombangi naashika otashi vulika shi ka dhigupaleke oshipotha. Oshipotha osha tsilikwa sigo eti 28 Febuluali nomufekelwa okwa li a kalelwa po paveta kuHenrico von Wielligh gwehangano P.D. Theron & Associates, omanga eindilo lyeifutilemo tali ka ningwa esiku ndyoka ta ka holoka mompangu oshikando oshitiyali.