Auleria Wakudumo
Opolifi moshitukulwa shaShana oi li mokashoko omunangeshefa, mwene wondingosho weedula dihe shivike eshi vati a kwata omunailonga waye weedula 24 keenghono.
Oshiningwanima eshi osha ningilwa momukunda Oshandumbala moshitukulwa shaShana, sha ningwa Etitatu, lwopotundi 03h00 youfiku lwaapo.
Edi oda kolekwa komukulunhu wopolifi koshikondo shokukonakona oimbuluma mOshana, Frederick Ndjadila.
Otaku hokololwa mwene wondingosho a lombwela omulandifi kutya otava i keumbo lovakulunhu vaye, komukunda konima yokuninga omalandifo efiku.
Omufekelwa okwa lombwela nakuningwa oshihakanwa kutya omalongekido a tya ngaha okuya keumbo lavo vati okwa li a longekidwa kukaume kopaihole komunailonga waye.
Eshi va fika, omunangeshefa vati okwa twala nakuningwa oshihakanwa monduda yaye ndele ta hovele okumukwata keenghono shihe li pahalo laye.
Nakuningwa oshihakanwa okwa kuwa vati eshi a mona kutya omunghona waye okwa hala oku mu kwata keenghono. Omumwainamati womufekelwa oo a li a nangala monduda i li popepi okwa pendulwa mo konghuwo ndele ta shivifile omufekelwa kutya eshi ta ningi osha puka.
Nande ongaho, opolifi oya holola kutya omunangeshefa okwa twikila ndele ta kwata omunailonga waye keenghono.
Oshiningwanima sha yooloka, opolifi moshitukulwa shaMusati oya tula omumati weedula 16 moipandeko eshi vati a kwata okaana keedula nhatu keenghono.
Oshiningwanima eshi osha ningilwa momukunda Oluvango popepi nOutapi, sha ningwa Omaandaxa lwopo 15h00 lwaapo.
Otaku hokololwa omufekelwa a nanena nakuningwa oshihakanwa monduda ndele te mu kwata keenghono.
Omufekelwa okwa tulwa moipandeko nomakonaakono opolifi otaa twikile.