Omunangeshefa gwomoKhorixas ngoka a li a itaala kutya okwa dhipaga ohonda ye nombistoli muNovemba 2016 mOtjiwarongo mOtjozondjupa, mOmaandaha okwa li a pewa egeelo lyoomvula 30 mondholongo. Omunangeshefa nguka Rudolf Huirad Gowaseb (60) – okwa li a monika ondjo momasiku 26 Aguste 2020 nokupewa egeelo komupanguli Christie Liebenberg, okwa li a monika ondjo yi li kohi yoveta yin a sha nomahepeko gomomagumbo yo2003, osho wo okukala nondjembo osho wo iilwitho shaa li paveta.
Gowaseb okwa li a itaala kutya okwa dhipaga ohonda ye, Rigarda !Noabes (27), mOtjiwarongo momasiku 12 Novemba 2016 sho a li e mu yaha iikando yontumba nombistoli ye.
Okwa li a monika ondjo mokuyaha ohonda ye ndjoka wo ya li yina yuunona we uwali, nokwa li a pewa egeelo lyoomvula 28. Okwa li a monika ondjo ishewe sho a li nondjembo niilwitho shaa li paveta nokwa pewa oomvula mbali mukehe oshipotha shoka.
Okwa li wo a lombwelwa kutya ita vulu okukala nondjembo uule woomvula ntano konima yegeelo lye. Nondjembo ye oya li ya kwatwa po noyi li momake gepangelo.
“Edhipagio tali ningilwa momagumbo epogolo enene. Edhipago oya li lyi nyanyaleka oshoka olya ningilwa omukiintu itaa vulu oku igamena. Omadhipago taga ningilwa aakiintu itaga ka idhidhimikilwa mompangu ndjika. Gowaseb ina simaneka uuthemba waakiintu wokukala nomwenyo,” osho omupanguli a li a ti ngaaka manga inee mu pa oomvula 30 mondholongo.
Gowaseb okwa li a popi komehio gompangu kutya okwa yaha !Noabes nondjembo molwongeyo sho a li e mu lombwele kutya okwa li a ya miihulo nomulumentu gulwe. Okwa li a yaha !Noabes sho a li a umbu iikuti ya adha pomugoyi nokwa li a hulithile mpoka.Ta ti okwa li a geya noonkondo nokwa li a uvu nayi kombinga yomaihumbato gomukiintu gwe. Okwa li a ti okwa ipa ombedhi moshinima shika. Okwa kala nale a li niipotha yilwe yonkambadhala yedhipago osho wo okukala nondjembo shaa li paveta pokati ko 1996 no2006.