Auleria Wakudumo
Opolifi moshitukulwa shaShana otai konakona oshibofa omo omunangeshefa e shiivike nawa a xulifa eshi vati e liyasha nondjebo meumbo laye.
Oshiningwanima eshi osha ningilwa meumbo lanakufya mOmashaka mOndangwa, sha ningwa Etitano lwopo 10h00 ongula.
Nakufya okwa tongololwa oye Israel Hidishange weedula 40. Hidishange omunangeshefa e shivike nawa molukanda lavo Omashaka.
Oshiningwanima eshi osha kolekwa komukulunhu wopolifi moshitukulwa shaShana, Commissioner Naftal Lungameni Sakaria.
Otaku hokololwa Hidishange a hangika mekungu lohonde eshi e liyasha vati nondjebo momutwe.
Opolifi oya holola kutya Hidishange okwa hangika nondjebo yaye, ombistoli ‘black glock 9mm’ meenyala.
Hidishange okwa li mwene woFine Butchery mOndangwa.
Opolifi oya holola kutya Hidishange ina fiya po etumwalaka tali holola osheetifi shefyo laye.