Victoria Kaapanda
OSHIKUKU – “Nonande Namibia lya manguluka omimvo 29 dha piti, omitima dhetu odhi li ashike muukoloni natango,” ndhoka odha popiwa komunangeshefa ngoka ha hondjo uukutu momatala gaShikuku, sho a li a gandja omaiyuvo ge nkene e wete elunduluko sho Namibia lya manguluka.
Omunangeshefa Regina Iiyambo ngoka a kala mongeshefa omimvo dha pita puhamano okwa li a popi ta ti ethimbo lyuukoloni okwa li e wete hwepo, nonando okwa li taya lulumikwa nokudhipagwa koombulu nomakakunya.
“Anuwa otwa manguluka, ihe emanguluka ngame kandi li uvite nando, oomvula 29 Namibia lya manguluka ashike kandi wete elunduluko moshilongo nenge uuwanawa washa. Omitima dhetu adhi lili ashike kehe esiku, dha lindimana nodha yemata konghalo tayi tu lulumike noonkondo”. Iiyambo ta ti ngaaka.
Iiyambo ta ti kehe shimwe oshepangelo ashike, kehe shimwe otashi futilwa mongashingeyi. Oosikola sho kwa li hadhi futwa okwa li hwepo ishewe oshoka ngele owa futu osikola N$200 lumwe, nena omvula otayi pu ko ashike inopulwashwa kosikola ndjoka.
Ta gwedha po ta ti osikola ihayi futwa ihe ohaya longitha iimaliwa oyindji shi vulithe sho ya li taya futu oosikola.
Oongeshefa itadhi ende we nawa ngaashi ya li ya tamekele petameko. Esiku otali vulu okupita omuntu ina landitha nando osha moongeshefa dhawo, oshoka pehala mpoka ye na okukala nenge oku landithila oya tembulwa po ya tulwa konkololo.
“Uuwanawa niiyamati yemanguluko lyetu lyoshilongo inatu wu mona natango, muule womimvo 29 dhaNamibia lya manguluka. Andi shi popi nomwenyo gwa yela kutya ngame itandi hogolola oshoka kandi na etompelo lyokuhogolola shoka itandi shi holeke nande”. Iiyambo ta yelitha.
Moonkundathana naKundana, aakalimo oyendji yomOshikuku oya li ya popi kutya, oye wete uuyuni awu zi kuuhwepo wa uka kuuwinayi, na itaya popile nande epangelo oshoka kaye wete aniwa lya etapo elundulo lyasha.
Aagundjuka otaya ningi inima iiwinayi noyinyanyaleka oshoka oye li momapandaanda ya ninga iihakanwa yomalovu oshoka kaye na sho taya ningi momagumbo, Epangelo itali gandja nande iilonga kaagundjuka.
Naampoka opo haya zi ya ka ninge omiyonena oshoka ookanalamwenyo dhaguundjuka kadhi li momalandulathano.