Okanona komimvo 10 okasi sho kali kapumwa kohauto Etine, no kali kahulitha ethimbo olyo tuu ndyoka.
Sha ikolela kuuyelele wa gandjwa komukuluntu gopolisi moshitopolwa shaShana Thomas Aiyambo okwa ti, okanona hoka okali kalyatwa lwopotundi 15h00 yomutenya momukuda Omaalala.
Otaku hokololwa kutya okanona hoka okalyatwa sho kwali taka ende pamwe nooyakwawo kooha dho pate.
Ta ti, okali kayi mopate nelalakano lyokutaaguluka nokali kapumwa kohauto nokusa ethimbo olyo tuu ndyoka.
Aiyambo ta ti, okanona hoka ohaka hiti osikola posikola pOmaalala primary nokali mondoondo ontintano.
Akwanzimo yako oya tseyithilwa.
Moshiningwanima inaashi fathana omulumentu gomimvo 58 okwamangwa po kopolisi moshitopolwa shaMusati, ta tamanekelwa endhipago lyomulumentu gomimvo dhopokati.
Sha ikolela kuuyelele wa gandja komukuluntu gopolisi moshitopolwa shaMusti Titus Shikongo okwa ti, oshiningwanima shoka osha holoka oshiwike shazi ko, momukunda Etunda moshitopolwa shaRuacana.
Otaku hokololwa kutya nakundhipagwa okwali a hangukununa omutamanekwa sho kwali taya nyenyeta nomupambele gwe, shoka shali shemu geyitha.
Shikongo ta ti, okwali a kutha emanya eta dhenge nakusa momutse no kwali a falwa koshipangelo.
Omolwa unene wuwehame ali mu wo, nakusa okwali a tuminwa natango kiipangelo ya yooloka sigo okoWindhoek eli onkalo ombwiinayi ali muyo.
Otaku hokololwa kutya omulumentu ngoka okwa kala ethimbo eli kiifudhitho sigo a hulitha oshiwike sha ziko.
Nakusa okwa tseika nedhina Sam Riuako a yambukile momukunda Etunda.
Oshipotha shoka osha undulilwa momasiku 31 gaMalitsa nuumvo. Nakutamanekelwa oshipotha okwa kalekwa mondholongo.
vkaapanda@nepc.com.na