Auleria Wakudumo
Peedula 19, Immanuel Paulus natango ota monika ashike a fa e na eedula 11. Paulus oku li monghalo oyo omolwounghundi waye oo ina ta ti okwa dalwa nao. Immanuel Paulus, omukalimo womolukanda Orutjanda mOpuwo iha dulu okweenda, okupopya, ile okulya ye mwene molwounghundi waye. Shaashi Paulus iha dulu nokulinyenga, oha kala a patelwa monduda konyala efimbo keshe manga ina a ka nyanga.
Ina, Maria Paulus okwa ti oye auke ha file oshisho okaana kaye, xe yaPaulus vati okwa faduka po nale a ya moAngola koshilongo shavo.
“Oundenge vaPaulus ihava kala mo meumbo okukwafela mumwaina, ohava kala ashike momalukanda,” Maria ta ti.
Maria okwa ti nonande e na ounona vamwe ovo vehe na ounghundi, vati meumbo ihava kala mo okufiila oshisho mumwaina. Ounona vati ohava kala ashike momalukanda tava endaenda.
Maria okwa ti oku na ounona vahetatu, vane ove li koAngola navane oha di navo, ashike meumbo ohave ya ashike ngeenge tava ka nangala.
Maria okwa ti oku na okufiya po Immanuel opo a ka konge ouxupilo.
“Ngeenge onda kala meumbo, ohatu file mo ondjala,” Maria ta ti.
Manga Kundana e li mokati keenghundafana naina yaPaulus, oundenge vamwe vaPaulus ove lituwa tava tavakana molukanda.
Umwe weedula 12 eshi a pulwa kutya oshike iha kala meumbo namukwao okwa ti oha i kofikola noku li mondodo onhivali. Konima, ova shuna molweendo lavo.
Ihava pewa vati oshikukuta kepangelo ashike ove na ovashiinda nomuleli wavo polukanda he va kondjele oku va pa omakwafo oikando ihapu.
Paulus ke na oufemba, onghene iha kwata opeendjela youlema i mu kwafele.
Maria meenghundafana naKundana omanga Paulus e li ashike mokalambidwa okwa ti ohashi kala shidjuu shaashi ohava di ashike monduda imwe aike yoipeleki. Okwa ti nande Immanuel e li monghalo yokudjala omulambo, ite u djala shaashi kape na oimaliwa yoku u landa.
“Okalambidwa oko handi longifa ongomunambo opo ashike ngeenge a hala okuya kondje kandi po, ota ile ashike pondje mokalambidwa kaye,” Maria ta ti.
Maria okwa ti yoo ohashi kala shidjuu shaashi meumbo kamu na eenduda nande okuli mbali. Ashike nande ongaho, okwa ti omo ashike hava di. Ovashiinda shaMaria ova ti nande have mu kwafele, otava kongo natango ekwafo kovakwashiwana va kwafele Paulus unene epangelo opo li mu kwafele a kale ta mono nande oikulya yoshikukuta.