OMUTSEGWONIME – Omukuluntu gwehangano lyoNamWater Abraham Nehemia okwa ti iilonga mbyoka yili metifa, okulongulula oopaipi dhomeya pokati kOndangwa nOmutsegwonime otayika pula oomiliona N$91.

“Ondu uvite nawa oshoka iilonga otayi ende nawa, naamboka ya pewa otendela oyetu kwashilipaleke kutya otaya longo nelalakano lyokumana pethimbo ndyoka lyuuvanekwa,” ta pandula ngaaka.

Nehemia okwa ti ominino ndhoka dhi na oovula dha piti po42, odha kulupa nodha kala tadhi gandja uupyakandhi wepato lyomeya sho dha kala nokutopaatopa.

Ta ti, oopaipi ndhoka oompe ngaashingeyi tadhi longwa otadhi kala ekandulepo lyomukundu gomeya moshitopolwa shaShikoto moka muna enota miitopolwa yilwe.

“Ondina otseyo kutya opena omahala gamwe ga ningi ethimbo gaana omeya, ihe ota tu kwashilipaleke kutya uudhigu mboka owuli metifa okukandulwa po,’’ ta po pi ngaaka.

Nehemia okwa tengeneke kutya iilonga ayihe mbyoka otayi kapwa okulongwa omumvo taguya muJuli. Ta gwedha po kutya ngaashingeyi otaya longo olweetho lwotango ndoka lwaza mOndangwa sigo Oshali, ookilometa 17, nolweetho olutiyali otalu ka landula ko.

“Natango iilonga yoopaipi oyili metifa koshitopolwa shaHangwena  hoka nako wo kuna uupyakandhi womeya, nuuna kwapu okulongwa oopaipi ndhoka otadhi ka tsakanena pamwe nokOshikoto opo uuna ombinga yimwe yaana omeya itapu kala pena epato lyomeya. Otaga kala taga zi kombinga yimwe,” ta fatulula ngaaka. 

Omunawino mehangano lyoNamWater Saltiel Shaanika okwa ti, iilonga yokulongulula oopaipi pokati kOndangwa nOmutsegwonime oyili metifa.

Ominino ndhoka omikulu otadhi longululwa nelalakano lyokukandula po uupyakandhi womeya moshitopolwa shaShikoto, mboka ngaashingeyi tau nyenyetwa koshigwana. 

Shaanika okwa indile wo oshigwana shi hulithe po okutunga kombanda yominino dhomeya.

“Oshigwana nashi hulithepo okutunga kombanda yominino oshoka ohashi kanitha oshindji. Ngele ominino ndhoka dha topa katuna nkene ta tu ningi po ihe okuteyagula po ashike etungo ndyoka kaapena okufutwa,” ta po pi ngaaka.

Ta kumagidha kutya oshigwana nashi kale hashi ningilwa omapekapeko gwomahala omanga inashi landa okuyanda uupyakandhi wuli ngaaka.

Shaanika okwa ti ngaashi ngeyi oya kambandhala okuenditha oopaipi ndhoka kooha dholutunde hoka itaku vulu okutungwa sha.

Enota lyomeya olyili unene uupyakandhi moshitopolwa shaShikoto, Ohangwena oshowo kOtsandi nOnesi. 

–vkaapanda@nepc.com.na