Charles Ndeumane
OSHAKATI – Omukalimo gwomOshakati Rosina David ngoka ha landitha iinima ya yooloka komalungula okwi ikuthile oshinakugwanitha shoku yambidhidha ospana yetanga yOshana Nampol niikutu yokudhana.
David (27) ngoka eli omutotipo nomukuluntuwiliki gwongeshefa yoAG Investment ndjoka hayi landitha iinima ya yooloka okuza kondje yoshilongo okwa ti omayambidhidho ngoka tagandja omukalo gwokushunitha moshigwana.
Okwa ti mompito ndjika okwa hogolola okuyambidhidha opolisi niikutu yetanga yongushu yoshimaliwa shoondola N$3000 opo a ulike olipandu molwa egameno niilonga mbyoka hayi longo moshigwana.
“Opolisi otwa kala tweyi talako onga aatondi yetu ashike otse yililepo. Nomayambidhidho ngaka otwa hala oku pandula opolisi molwa ombili negameno ndyoka hayi kalekepo moshigwana. Ethimbo limwe ohandi kala ndazamo moshilongo ashike sho tandi galuka ondishi kutya otandi adha iinima yandje ayihe yili megameno. Onda koneke ishewe kutya opolisi ihayi ningi iimaliwa yoku ilandela iinima yoludhi nduka onkene oyi inekela momayambidhidho ngoka hayi pewa,” David ta ti.
Anuwa oshiwike shaziko David okwa gandja omayambidhidho gafaathana kuuministeli welongo, nomanga omvula inaayipwa otaka gandja ishewe omayambidhi kuuministeli wa yooloka.
“Mongashingeyi ohatu gandja ashike omayambidhidho koospana dhetanga oshoka ongeshefa yetu oya landitha unene iikutu yetanga. Ihatu tseyitha kutya otatuka yambidhidha uuministeli wuni, ohatuya ashike nale nomayambidhidho ga longekidhwa. Elakano oku tunga omakwatathano omawanawa noshigwana mwa kwatelwa aakomeho yetu,” osho David a popi ngaaka.
Omukuluntu gwopolisi moshitopolwa shaShana Commissioner Naftal Lungameni Sakaria okwa ti omayambidhidho otaga kumike aadhani opo ya longe nuudhiginini ya tsikile nokuvena.
“Paife aadhani oyena iikutu iipe, yo ngaashi ya venapo ekopi lyoliha ontitatu omukumo gwawo oguli pombanda. Otwi inekela kutya paife sho ospana yeshipondola okuya koliha ontiyali yomoshilongo otayika hila aadhanidhingi moshitopolwa yetu wayimine,” Sakaria ta ti.