Omupedu Commissioner mukulu wopolifi woshitukulwa shaKhomas Edward Haiduwa (62) okwa xulifa eshi e liyasha mwene nondjebo mokanya Etivali.
Oshiningwanimwa eshi osha ningwa efimbo lokonguloshi meumbo laye momukunda Omulingi moshitukulwa shaShikoto.
Komufala wopolifi moshitukulwa shaShikoto Armas Shivute okwa hokolola ta ti Haiduwa okwe liyashela monduda yaye yokunangala pefimbo ovaneumbo aveshe va hangika va kofa.
Vati okamatyona haka longo meumbo laye oka uda ondjebo ya topa nokonima yefimbo oka ya konduda yaHaiduwa opo ka tale kutya oshike sha topa.
Vati eshi ka fika monduda yaye oka hanga nale Haiduwa a nangala pedu a xulifa, nondjebo i li puye.
Opolifi oya hokolola tai ti Haiduwa ina kala e na omadidiliko okulikufa omwenyo, yee vati ina fiya po omukanda tau yandje ouyelele kombinga yefyo laye.
Kape na omunhu ta fekelwa mefyo laye onghee omakonakono opolifi ota twikile.
Kakukutu wopolifi moNamibia Inspector General Sebastian Ndeitunga okwa ti oshiningwanima shefyo laye otashi halila neenghono.
“Oshikondo shopolifi ashishe osha dengwa pomutima kefyo laDeputy Commissioner Haiduwa eshi eli ya sha nondjebo mokanya. Okwe tu fiya momalimbililo, unene tuu eshi ina fiya po omukanda wa sha,” Ndeitunga ta ti.
Okwa hokolola ta ti Haiduwa okwa kala omunambili, alushe ha longo oilonga yaye nondjungu pefimbo a li ta longele keembelewa dopolifi koWindhoek.
Okwa weda po ta ti oshiningwa eshi otashi nyenyemateke ounona vanakufya Haiduwa.
“Ovanhu nava kale tava kongo omakwafo kovaxungimwenyo ile kovafitaongalo ngeenge tava hepekwa koupyakadi wopamadilaadilo shaashi oku li kufa omwenyo ka kushi e kandule po lomukundu,” Ndeitunga ta ti.