Omunambelewa wopolifi weedula 48 okwa kwatwa po shaashi vati a kwata okaana kaye keedula 15 onghonga lwoikando ya yooloka.
Oshiningwanima eshi vati osha ningilwa meumbo lavo li li momukunda Ondingwanyama moshitukulwa shaHangwena okudja 2020 fiyo oneudo.
Omufekelwa ou okwa hokoloka momhangu yamangestalata waEenhana mEtivali, omo oshibofa shaye osha undulilwa komafiku 7 Okotoba 2024 opo ku ningwe omakonakono omoule.
Omukulunhu wopolifi koshikondo shokukonakona oimbuluma moshitukulwa shaHangwena omupedu komufala Zachariah Amakali okwa hokolola ta ti omutamanekwa okwa kwatwa po mOmaandaxa konima eshi okaana ka lombwela omuhongifikola wako woLife Skill kutya oka loloka okuningilwa omahepeko opaixulo kuxe.
Ota ku hokololwa kutya omupolifi okwa kala nokuya moixulo nokaana kaya ina longifa ongumi.
Opolifi oya hokolola tai ti omulumenhu okwa kala vati a ndele omonakadona eepela odo hadi longifwa kovakainhu okulela eteelelo.
Okaana keumbo oko paife oka tembulwa ko, ota pewa omayakulo exungomwenyo.
Omakonakono opolifi otaa twikile moshikumungu eshi.
Eshi a kwatafana naKundana kakukutu kopolifi Inspector General Joseph Shikongo okwa ti ovapolifi otava longo oilonga tai fifa oshiwana ohoni.
“Omupolifi okwa pumbwa okuulika oshihopaenwa shiwa moshiwana molwashi oha longo noveta,” ta ti.
Okwa kumaida ovapolifi opo va xulife po okulonga oimbuluma shaashi itashi ulike efano liwa moshiwana.
Shikongo okwa ti okwa didilika oshitukulwa shaHangwena nOmusati ta ku lopotwa oibofa yomakwatonghonga ihapu.
“Ovalumenhu ohatu longela nai ovakainhu nounona ominyonena. Natu xulfe po oku ya moixulo nounona va shona,” ta ti.
Okwa ti ovalumenhu nava ka konge omakwafo kovaxungimwenyo nggeenge tava hepekwa koupyakadi wopamadilaadilo.
Neudo moshitukulwa shaShana omwa lopotwa omulumenhu weedula 44 womukulunhufikola kwa li a kwatwa po shaashi vati a kwata okaana kaye keedula 15 onghonga.
Omulumenhu ou naye okwa li hadi nokaaana kaye keumbo laye kOshakati.
Ovakainhu otava hokolola tava ti paife ohava kwata komalipulo ngeenge ounona vavo voukadona ve li komaumbo ooxe.
“Paife omunhu oha kala ashike to li pula ngeenge okaana oko ye ke li kuxe shaashi ovalumenhu paife oha kwatwa komhepo yoku ya moixulo nounona vetu, umwe womudali ta hokolola.
–fhamalwa@nepc.com.na