Festus Hamalwa
Omulumenhu weedula 47 kwa li ha longo onga omupolifi moshitukulwa shaKhomas okwa kwatwa po Omaandaxa eshi vati a denga omulumenhu ou kwa li tava tanguna naye.
Oshiningwanima eshi osha ningwa Osoondaxa moKhomasdal moWindhoek efimbo lokomatango.
Nakufya okwa tongolwa oye Richter Vauchn Quillan weedula 36.
Omupopiliko wopolifi moshitukulwa shaKhomas Warrant Silas Shipandeni okwa hokolola ta ti ovalumenhu ova shakena mepandaanda, okudja opo vati omufekelwa okwa tameke ta ula mukwao oitya ii.
Vati okudja opo omufekelwa okwa nukila Quillan ndele te mu denge pedu, noku mu denga neengonyo moshipala ndele te mu fangaula nomalunha.
Opolifi oya hokolola tai ti eshi nakufya ta kendabala okuyambuka po yee omufekelwa natango ota mu denge neengonyo.
Okudja opo nakuninga oshihakanwa okwa ya keumbo lavo nokonima eshi a fika meumbo okwa lombwela ovaneumbo vaye kutya ota vele eshi a dengwa.
Nakuninga oshihakanwa okwa kala ta keme ta ti kutya okwa dinda molutu a fulila ohonde eshi a langaulwa komupolifi ashike ovakwapata vaye inava ninga onghendabala yoku mu twala koshipangelo efiku olo.
Efimbo longula Omaandaxa eshi mumwainamati a ka tala monduda yaQuillan kutya oku li po ngeipi okwa hangika nale a xulifa a nangala kombete yaye.
Okudja opo ovaneumbo ova shivifila opolifi nokonima olutu laye ola twalwa koshipangelo opo li ka ningilwe omakonakono.
Opolifi oya hokolola tai ti konima eshi olutu laQuillan la ningilwa omakonakono oidjemo oye uya tai ulike kutya okwa fya sha etwa eshi a dengwa.
Omufekelwa okwa kwatwa po Omaandaxa efimbo lomutenya nota holoka momhangu nena Etitatu eshi ta pangulilwa oshibofa shedipawo.
Omakonakono opolifi otaa twikile moshikumungu eshi.
– fhamlwa@nepc.com.na