Auleria Wakudumo
Omuprima woshilongo Elijah Ngurare okwa pandula olupandu komukwaniilwa waNdonga, omukwaniilwa Fillemon Shuumbwa Nangolo eshi a dana oshilonga sha fimana mokukwatela komesho okulonga oikulya mOndonga.
Ta popi komusha wofikola Onaanda Combined moshitukulwa shaMusati mOlomakaya, Ngurare okwa holola kutya omukwaniilwa wAndonga okwa palela ondjila iwa oyo tai dulu okushikulwa kuvahapu mokulonga oikulya nokukandula po ondjala moshilongo.
“Omukwaniilwa wAndonga okwa ulika oukwatya muwa womuleli nokwa holola kutya okulonga oikulya ohaku tamekele keumbo,” Ngurare ta holola ngaho.
Omuprima okwa holola kutya ngeenge omalelo opamufyuululwakalo aeshe okwa landula oshihopaenenwa osho sha ningwa kOndonga, nena Namibia otaka kandula po omukundu wokuhaena oikulya oshoyo okuyambula po oshikondo shounamapya.
“Onghene ohandi indile ovaleli vomifyuululwakalo aveshe opo fyuulule po onghedi iwa okudja komukwaniilwa wAndonga, tave shi ningi mokuyandja edu koshiwana sheni opo shi dule okulonga oikulya nokuyambula po okuuyemo yavo,” Omuprima ta indile ngaho.
Ngurare okwa ti eindilo laye ola nyama keindilo lOmupresidente Netumbo Nandi-Ndaitwah eshi a indila Ovanamibia va longe oikulya yavo vene opo veli yave okukala veli kolelela kondje yoilongo ngeenge tashiya koikulya.
Omuprima okwa holola olupandu kofikola yaNaanda Combined shaashi tai shi endifa nawa mehongo. Ngurare okwa yandja oN$5 000 pefimbo lomusha wofikola nokwa yandja yo ekwafo loshimaliwa shoN$4 000 okukwafela meyandjo lomapapa kovahongwa ovo veshi endifa nawa okudja kondodo yotete fiyo onimuwoi.
“Otwa holoka yo nena apa okutyapula oshivilo shediko lenguwo loundokotola lomulihongi oo a dja pofikola yaNaanda Sioni Ileka,” Ngurare ta ti.
Ngurare okwa twa ovahongwa Ovanamibia opo veli honge nelitulemo nonoudiinini opo va dule okumona oilonga yomaifano a yooloka nokuyambula po eliko loshilongo. Okweva twa omukumo kutya ovo ovaleli vokomongula neliko loshilongo otali ke li kolelela kuvo.
Omuprima okwa holola kutya naye opo a fikola pofikola Onaanda Combined. Okwa ti ofikola oya konyola ovanhu va fimana moshilongo. Aishe ei omuprima okwei holola oku twa ovahongwa omukumo opo veli tule mo mehongo lavo.
-wakudumoauleria@gmail.com