Auleria Wakudumo 

Omuprima woshilongo Elijah Ngurare okwa popila eanyo lomayakulo ointerneta yoshipuna Elon Musk yedina Starlink moNamibia. Edi omuprima okwedi holola momutumba wopashiwana Etine pefimbo ta nyamukula komapulo a pulwa kOmupresidente wongudu yoPopular Democratic Movement (PDM), McHenry Venaani koradio yomudidimbe yoNBC. 

Venaani okwa li a pula omuprima kutya epangelo ola ninga etokolo lokuanya omayakulo oStarlink ngahelipi. 

“Namibia ita ka nhuka po ile a edameke eeveta nomilandu daye molwa eengeshefa dokondje yoshilongo,” Omuprima ta holola ngaho. Okwa ti oshilongo ita shi ningi oukombuda molwaashi ashike omunhu eshiivike nawa ile shaashi omayakulo otaa di kondje yoshilongo. Ngurare okwa weda po kutya omilandu adishe odina okulandulwa. 

“Ngeenge otwa hovele okutambula ko omayakulo aa nena otashi ulike oulingilingi nokuha shikula omilandu detu vene,” Ngurare ta holola ngaho. 

Omuprima natango okwa popila epangelo eshi a pulwa ngeenge otava ningi omatokolo atya ngaha molwa enwefemo okudja kodje yoilongo imwe. 

Ngurare okwa ti Namibia oha ningi omatokolo kuye vene. Ngurare okwa kwashilipaleka kutya epngelo ina li pumbwa elidope mo lalye opo li katuke onghatu. Venaani okwa holola olupandu kepangelo laNamibia eshi la ninga etokolo eli ashike okwa ti okwa li vena okumona olopota tai holola kutya oshike la tokola okuanya omayakulo ointerneta ei onga oilyo yomutumba wopashiwana oyo hai ungaunga noveta. 

Minista womauyelele womakwatafano opaungoba Emma Theofelus okwa holola kutya epangelo ola dika eenyala medu okutambula ko elongifo lomayakulo ointerneta yedina Starlink yoshipuna Elon Musk molwaashi ina i wanifa po oipumbiwa aishe. 

Ouministeli womauyelele pamwe nehangano lokukwashil ipal eka omakwatafano la shiivika nawa Communications Regulatory Authority of Namibia (Cran) ova holola kutya Starlink okwa wanifa po ashike omilandu nhatu domomilandu hamano. 

“Oshipumbiwa sha kula osheshi kutya ointerneta kehe nai kale ina oipambuliko yeepelesenda 51 dOmunamibia nadikwao otadi dulu okukala kovadjaidjai,” Minista ta yelifa ngaho. Starlink okwa wanifa po ashike imwe yomoipumbiwa ngaashi, okwa edaneka taka yandja omakwatafano opainterneta oshali koikololo aishee yaNamibia, mwa kwatelwa momikunda, mendoolopa nomefaalama. 

Nande ongaho, minista okwa ti eshi itashi tin a pewe epitikilo shaashi okuna okuwanifa po aishe ya pulwa. 

Starlink okwa anywa yo moNamibia molwa eameno louyelele woshilongo. 

Otaku hokololwa omakufikufi ointerneta a didilikwa moNamibia momudo 2024 shi heli paveta. 

-awakudumo@nepc.com.na