Komurungu maku munika ayo peno suvaneno kovature va Zonḓati na Matjete mOkarukondwa kOmatoororero ka Dauresa tjinga omaunguriro womuriu womeva amaye ya kokumanuka momautiro wombura ndji mai yende.
Ovature, ozosikore nozokirinika mozondendera tjiva nai ze muna omeva okuza kOkombahe peyapayuva. Katjisupi Omuhaamise wOvihavero vyOtjirata tja Rongo, Benita Imbamba, mo ma utiro wo mweze imbwi wa raisire kutja otjiungura hi tja manuka ozoperesende 35. Na tja otjo tji ri komurungu woruveze nu tja sere okumanuka, nomuriu mbwi woure wozokirometa 23 matji manuka mu Tengarindi ombura ndji mai yende.
Otja ku Imbamba, omuriu mbwi mau yeta osuvaneno onene tjinene koviwaṋa mbi nonyota mOndauresa, oure wozombura hambombari nai mbwa haverwa i yourumbu. “Oviwaṋa mbi nai vi undja kOtjirata okuvepa omeva peyapayuva. Nungwari oyo kaye yenene okuvikovisa. Posi ya matu yenene okuvitjivisa kutja omutunge u ri komurungu woruveze nu karure ouzeu wavo womeva tjandje wa yanda,” Imbamba ma tja nao.
Oupapi nouparanga otjiungura hi tja yakurwa i yotjiwaṋa tja Matjete nongondoroka mokutja porwe katji nokuvepa omeva omatekwa nungwari wina oviungura nokuveyenenekisa motutumbo novikunwa. Omueze mbwa zu ko Ombara Manase Zeraeua mouyenda wOkomiti Ongarerere yOndjuwo yOzoveta yOzomburo zOmbutiro, wa tja: “Ouheṋa womeva u remanisa ongaendero komurungu movikunwa mehi rakangamwa”. “Ehi randje rakangamwa, otja tji mo tjiwa, aruhe ri kara mozombuze mena okuhina omeva. Katu nomeva kaparukaze. Mongoramambo aruhe mu resa kutja okirinika nozosikore za patwa mena rouhepe womeva. Mbi kara kombanda yohoromende yetu,” ma tja nao. Na handjaura kutja va ningira omatemba kutja ye havarise omeva peyapayuva, kozokirinika na kovature na kozosikore. “Otjo tjiri ve tuma omatemba tjiva eṱe nai ngu tu ungurisa okukondja kutja omeva ye vaze ku kangamwa omuture ngu ri mozondendera zetu. Matu zeri kutja omuriu mau manuka tjimanga okuyandja omapupurukiro kominyo vyovandu vetu,” Ombara Zeraeua ma tja nao.