Auleria Wakudumo
Minista woilonga noyeendifo Veikko Nekundi pamwe naNgoloneya woshitukulwa shaMusati Immanuel Shikongo ova patulula pambelewa opate yaTsandi-Omugulugwombashe osho yo okupatulula opate yaTsandi-Onesi-Epalela oyo tai twikile okulongwa.
Pefimbo ta patulula opate yaTsandi-Omugulugwombashe okwa holola kutya opate ipe otai ka kwafela oshiwana opo shi dule okuhanga eenhele da yooloka noupu, okuxwepopaleka onghalo yondwi yokokapate komamanya osho yo okweendwa koihauto noupu. Opate otai kwatakaneke ovaendi vopomidingonoko: Tsandi, Omugulugwombashe nomikunda dopoushiinda. Minista okwa ti opate oya ya kOmugulugwombashe, fiyo hano okomaendo omapendafule.
“Epangelo tali pangele ola eta omalunduluko manene moshiwana nelunduluko limwe lakula okuyambula po eepate moshiwana nokutula oshiwana shavo komesho,” Minista ta holola ngaho.
Minista okwa holola kutya opate ei oya tungwa kongushu yoshimaliwa shi fike peemiliona N$84,9 osho sha futwa keemuma kepangelo. Ovakwashiwana vopomudingonoko navo ova mona omauwa okudilila mopate omu, ovakainhu novalumenhu 198 ova mona oilonga, eesipana domatanga domidingonoko oda pewa omidjalo detanga noilongifomwa aishe kwaavo va mona oteendelela yokulonga opate. Minista okwa ti kutya opate ei itai kwatakanifa ashike omikunda ashike otai yambula po yo eliko loshilongo.
Omunashipundi wehangano lokupangela eendjila ledina Roads Authority Martins Kambulu okwa holola kutya etwikilo lopate yoTsandi-Onesi-Epalela ola kuma ovanamukunda vahapu.
“Ohatu pandula ovakwashiwana eshi va kala nokulididimika nokulongela kumwe nepangelo opo ondjodi ei itwe,” Kambulu ta ti.
Ngoloneya woshitukulwa shaMusati Immanuel Shikongo okwa patulula pambelelwa oproyeka yopate yaTsandi-Onesi-Epalela.
Shikongo okwa ti opate ei oyo eudaneko kovakwashiwana vomoshitukulwa shaMusati okudja kepangelo.
“Oule wefimbo, ovanhu vetu ova kala ve na oudjuu wokukwatafana nokuya koshipangelo, keefikola nokuya keefitola va ka konge oipumbiwa yavo,” Ngoloneya ta holola ngaho.
Ngoloneya okwa kunghilila ava tava longo opate opo va longe nondjungu nokukwashilipaleka kutya ova mana pefimbo.
Elenge la kula lili koshipundi shUukolonkadhi Malakia Shoombe okwa ti oshiwana shaye osha kala nokukuwa onghuwo yopate oule wefimbo. “Otwa kala nokupula opate yoteya oule weedula. Opate ei otai tu etele omauwa mahapu. Otai yambula po eengeshefa, tai kwatakanifa oipangelo neefikola,” Shoombe ta ti.
Shoombe okwa ti ohava kala ve na omaulikilo oipindi keshe kodula Etaka Annual Trade Fair ashike ovanhu vahapu ihava fiko ko molwonghalo yii yopate. Okwa ti ei ipe otai eta ovalandifi novalandi vahapu komudingonoko wavo.
“Ovanhu vetu vamwe ohava kala va ombokelwa ndele natango otava ende ashike kopate tai ngwalauka osho tashi dulu oku va etela vali unene,” Elenga tali ti ngaho.
-wakudumoauleria@gmail.com