Fourie Nhoni
Omunongo gwiilonga yokoonyala, a yambukile komukunda Onhokola moshitopolwa shaMusati ota pula omayambindhindho okuza kepangelo, opo ga ninge ondjodhi ye yo shili.
Johannes Kalumbu (57) okwa hala okuyambindhindhwa neshina lyokuninga oongaku, omapaya oondjato na kehe shoka hashi vulu okuetwa po okupitila moshipa sha kola, a vule okuyambula po ongeshefa ye.
Kalumbu okwa putuka tadhana uundhano woku foloma oongaku dhomavi oshowo okudhana etanga lyokoompandhi. Oshitalendi ena, oshuuvalelwa mo, okwali sha dhimbululwa kaalongi sho kwali a ningi oongaku ndhoku zala okuza moombale. Kalumbu sho a ningi omumati ta vulu okwiinyangela, okwali ayi koshilando pangelo, hoka a ka gwedhela ko uunongo we onga omweti po gwiizalomwa.
Momumvo 1990, okwali a mono iilonga kokasitola kookuhondja oongaku hoka ka li komukiintu gOmugerman, ngoka ali natango emu pe ompito yoku kiigwedhelako uunongo koSouth Africa. Omulumentu ngoka okwali a tsakaneke ishewe omukiintu omunangeshefa gokOshakati, ngoka ali e mu yambindhindha oku mu futila osikola, okulonga nawa iipa oshowo okuhondja opo a eete po sha, kosikola yedhina Cosdec koTsumeb.
Nonando Kalumbu a mono uunongo awihe mboka, anuwa okwa kala noku pula omayambindhindho gokulandelwa eshina lyokuhondja oongaku okuza komauministeli gayooloka ihe okwa huulile muunyengwi.
“Mo2016 ooministeli dhepangelo okwali dhina ooprogalama dhoku yambindhindha aanangeshefa aashona nomashina ga yooloka. Okwali nda ningi eyindilo ihe inandi pita mo,’’ ta ti ngaaka.
Kalumbu ta ti, ngele okwa a yambindhindhwa neshina otashi mu kwathelu okulundulula onkalamwenyo ye. Ta popi ta ti, ngaashingeyi ota longitha ashike oonyala, okulonga oshowo oku eta po sha, shoka tashi pula oonkondo oshowo ethimbo olindji.
Ta ti, ota indile moshigwana ngele opena ngoka ta vulu oku mu yambindhindha neshina opo a vule okulonga. ‘’Elalakano lyandje kali shi ashike lyoku eta po iizalomwa ihe olyoku kwathela wo oshigwana, eshina ota li yambindhindha ndje oku eta po oongaku dhoosikola, unene kwaamboka kaaye na iiyemo, oshoka ongaku ndhandje ondhina ombiliha,” ta ti ngaaka. Ta ti, okuna omukumo kutya esiku limwe ondjondhi ye onayi ka ninga oshili.