Omutse gwomuntu ogwa toolwa kokanona komimvo 14 popepi nondjila yeshina lyolutenda mondoolopa yaGrootfontein.
Omupopiliko gwopolisi moshitopolwa shaTjozondjupa Maureen Mbeha okwa ti omutse ngoka ogwa toolwa koGrootfontein mEtiyali.
Otaku hokololwa kutya kape na uuyelele natango ngele omuste ngoka ogomulentu nenge omukiintu.
Onkene opolisi otayi indile moshigwana ngele ope na mboka ya kanitha omupembele gwawo ya ninge omakwatathano.
Moshiningwanima inaashi faathana naashoka, olutu lwomulumentu gwomimvo 37 olwa adhika metale lyomeya, konima a ningi omasiku gaali ta kongwa.
Omugandji gwomauyelele gwopolisi moshitopolwa shaShikoto Ellen Nehale-Kangulu okwa ti olutu lwomulumentu ngoka olwa monika Osoondoha momukunda Ompugulu momudhingoloko Onayena.
Otaku hokololwa kutya aakwanezimo oya kala nokukonga omulumentu ngoka sho ya li ye mu ihulu Etitano.
Kape na natango uuyelele kutya okwa si omeya ngiini, nomakonaakono gopolisi oge li metifa. Nakusa okwa tseyika nedhina Eliaser Nakathingo.
Opolisi moshitopolwa shaShana oya lopotelwa oshiningwanima moka okanona ka gwile momeya mehuliloshiwike. Anuwa okanona hoka oka li ka thigilwa aanona aakwawo molukanda lUupindi mOshakati.
“Omeya oshinima sha nika oshiponga, unene kaanona. Ndika ethimbo lyomvula, ihe omaso guunona tawu si komeya ohaga lopotwa unene,” Omupopiliko gwopolisi mOshana Inspekta Frieda Shikole ta ti.
Shikole ta ti aakuluntu naya kumagidhe aanona kaaya dhane yo ya kale kokule nomithima, omatale osho wo oondungu dhomeya. Aanona taya zi koosikola naya londondhwe yaa mbwinde omeya, onkene aanona naya ukulile komagumbo.
Opolisi moshitopolwa shaShana oya lopota omulumentu gwomimvo 32 i iyaha okusa nondjembo mokana komeho gwomumwayinakadhona.
Omupevikuluntu gwopolisi moshitopolwa shaShana Frederick Ndjadila okwa ti oshiningwanima osha holoka mehuliloshiwike komukunda Onamavo.
Otaku hokololwa kutya omulumentu ngoka ka li a popi kutya oku na uudhigu omanga ina iyaha nondjembo mokana, nonando e shi ningi omanga e li nomumwayina. -vkaapanda@nepc.com.na