Bamako – Aaleli yiilongo yontumba yomuuninginino waAfrica oya li ya gongala moBamako mEtine sho taku ningwa ishewe oonkambadhala oompe okuhulitha po onkalo yopolitika ndjoka tayi tengaatenga moMali. Momutumba gwi ikalekelwa gwesiku limwe, aapresidente yaSenegal, Ivory Coast, Nigeria naNiger oya li ya ningi iilage napresidente gwaMali Ibrahim Boubacar Keita osho wo naaleli yoongundu ndhoka tadhi ningi omahololodhilaadhilo tadhi pula a thige po oshipundi. Omakuyunguto ngaka oga tula iishiindalongo yaMali momalimbililo, osho wo iilongo mbyoka ha longele kumwe nayo, sho ya tila kutya oshilongo shika otashi vulika shi ye momake gaatsindumbo nepangelo.

Presidente Alassane Ouattara gwaIvory Coast naMacky Sall gwaSenegal oya li ya tsakanekwa kupresidente Keita pokapale koondhila.

Oya li taya ka landulwa kupresidente gwaNigeria Muhammadu Buhari, Mahamadou Issoufou gwaNiger osho wo Nana Akufo-Addo gwaGhana. Okangundu okashona kaaholimadhilaadhilo oka li ka gongala pondje yokapale.

“Otwa holoka mpaka tu pule IBK a ze miilonga notukwashilipaleka kutya ooyakwetu mboka ya dhipagwa itaya dhimbiwa,” Osho Yaya Sylla, omuhololimadhilaadhilo omugundjuka a ti ngaka.
The June 5 Movement, lya lukilwa esiku ya tameka okuholola omadhilaadhilo gawo otaya ti kutya Keita okwa nyengwa okuyambula po eliko lyoshilongo, epangelo lye otali lungu nokwiitapula osho wo oomvula adhihe hetatu moka iikulo ya kala nokukondjitha epangelo.

Aamali oye li wo ya hala etokolo lyompangu lyiizemo yaMaalitsa naApiilili mbyoka ya li ya pe ongundu yaKeita esindano momahogololo gopliamende. Omutumba nguka ogwe ya konima sho iilongo omu-15 yongongahangano yoEconomic Community of West African States (ECOWAS) ya li ya ndopa oku eta po ombili pokati koongundu ndhika mbali. -Nampa/AFP