Omutumba gwomalelo goondoolopa moshilongo kohi yehangano ta li ithanwa Association of Local Authorities in Namibia(Alan) ogwa tameke nena, no tagu ka hula mOlyomakaya mOshakati.
Omutumba nguka otagu ningwa oshikando oshitiyali mOshakati poUnam, moka gwa li gwa nigwa lwa hugunina momumvo 2016.
Omupresidente goAlan Katrina Shimbulu okwa ti, aakaleli po yomalelo goondolopa moshilongo ashihe ye vule 300 oya tegelelwa okuholoka nena.
“Omutumba gwonuumvo otaguka ningwa kohi yoshipalanyolo ‘Okutunga nokuhumithakomeho omalelo gomoondolopa’,”
Ta ti, omutumba nguka otagu ningwa lwotango nkene omukithi goCovid-19 gwa ponokele moNamibia. Ta gwedha po ta ti, elalakano olyo okukundathana nkene yena okuhumitha komeho omalelo gomoondoolopa moshilongo ashihe. “Omukithi goCovid-19 ogwa li gwa halakanitha no gwa shunitha oyindji monima, onkene momutumba muka ota tuka kundathana nkene tuna okuhumakomeho,” ta ti ngaaka.
Shimbula okwa popi kutya ehangano lyawo lyoAlan olya li lya dhengwa pevi komukithi ngoka, no lya li lya shuna monima sho lya li lyi li po kutula milonga omalalakano nomatokolo ga li ga ningwa momutumba gwa huguninwa gwa li gwa ningwa mo2016.
‘’Omutumba nguka otaguka gandja ewi nkene omalelo gomoondoolopa taguka galula oonkondo eyinekelo oshowo okulela oshigwana sho omukithi goCovid-19 gwa hanagula nokushunitha oshindji monina,” ta ti ngaaka.
Ta gwedha po ta ti, esiku lyonena otaya ka kundathana omaupyakadhi, omauwanawa, omilandu, onkalo oshowo kehe shimwe tashi hunitha monima nenge tashi humitha komeho omalelo goondoolopa, nankene shina okukandulwa po. “Omutumba nguka ogwa tegelela omupevi presidente Nangolo Mbumba oshowo minista gwomoondoolopa nokushayi Erastus Uutoni,” ta ti ngaaka.
Shimbulu okwa ti, nena otayaka hogolola iilyo iipe yongundu yoAlan oshowo omupresidente nomupevi presidente.
“Ndjika otayi ka kala ompito ombwaanawa yomalelo goondoolopa moshilongo okukundathana omikalo dhoku humithakomeho,”ta popi ngaaka.
– vkaapanda@nepc.com.na