Joe Matheus, oo a kala omuxwaxwameki wongudu yo-IPC moshikandjahoololo shaHangwena okwa ti ina hala vali okukala oshilyongudu sho-IPC.
Matheus okwa yandja omukanda Omaandaxa kombelewa yo-IPC ta ti ota fiye po ongudu yo-IPC molwaashi ina panda omatokolo taa ningwa kewilikongudu.
Meenghundafana a ninga naKundana, Matheus okwa ti okwa kala omuxwaxwameki omunandjungu okudja 2019 e kwetele ongudu komesho moshitukulwa nokuxwaxwameka ovanyasha va waimine ongudu.
“Onda hala ndi ka fude po.
Ondi wete kutya onda dana onghandangala yakula mokuyambula po ongudu yo-IPC moshitukulwa shaHangwena,” Matheus ta ti.
Okwa ti natango komesho yeedula oku na ehalo lokuwaimina ongudu yopapolitika yehoololo laye molwaashi Namibia oshilongo sha manguluka nomunhu keshe oku na oufemba wokuya mongudu omu a hala.
Okwa weda po ta ti ota yandje yoo vali omhito kovanyasha vo-IPC opo va kufe po oshinakuwanifa shaye va kale ve kwetele ongudu yavo komesho.
Omunashipundi wo-IPC moshitukulwa shaHangwena Philipus Nalungu okwa koleka ta ti Matheus okwa fiya po ongudu yavo konima a tambula ko omukanda waye Omaandaxa.
fhamalwa@nepc.com.na