Omunambelewayambidhidhi kwa li gwanakusapresidente Hage Geingob Penda Leonald Namuhuja gwomimvo (65) okwa tindilwa eyifutilemo mondholongo sho anuwa a kwata koonkondo okanona komimvo omugoyi.
Otaku hokololwa Namuhuja ngoka a li wo omuyambidhidhi gwomupilima omukulu Nahas Angula a ningile okanona hoka ke mu pamba omuyonena gwopaihulo.
Oshipotha she osha undulilwa komasiku 29 Mai nuumvo, opo a vule okuninga eyindilo lyeyifutilemo.
Sha ikolela komupevikuluntu gopolisi Hermanus Neel, oshiningwanima shoka osha ningwa muMaalitsa nuumvo iikando ya yooloka momukunda Oniihandi momudhingoloko Oniipa.
Namuhuja anuwa okwa kala ha iyakele mondunda yokanona uusiku ngele ka kotha ye teka heke nuuleke kaaka popye sha, opo a vule oku ka kwata koonkondo.
Oshinima shika anuwa oshe ya puuyelele sho omukulukadhi gomutamanekwa a li a thindikile okanona kegumbo limwe lyaapambele, ihe ina gandja omatompelo kutya oshike inaaya hala we okuza pamwe nokanona.
Aapambele yokanona anuwa okwa li ya dhimbulula kutya okanona itaka ende nawa, e taye ka fala koshipangelo hoka ka monika kutya okaningi ethimbo taka kwatwa koonkondo.
Sho ka pulwapulwa komuhingimwenyo, opo ka popi kutya oka kala nokukwatwa koonkondo kuNamuhuja, ihe oka lombwelwa kutya ina ke shi popya.
-vkaapanda@nepc.com.na