Opolifi moshitukulwa shaKaras otai konakona oshibofa shomulumenhu womukwashiwana waZimbabwe ou a kwatwa po Omaandaxa molwashi vati a kengelela ovanhu nofikola yoipupulu.
Omufekelwa okwa kwatelwa modoolopa yaLuderitz konima eshi ovakwashiwana va lopotela opolifi kutya ota futifa ovanhu oshimaliwa ashike ke na shili ofikola.
Omukonakoni woimbuluma wopolifi moshitukulwa shaKaras omupedu Commissioner Nicodemus Mbango okwa hokolola ta ti omufekelwa okwa tula komalungula ndele ta tula vali eembapila peenhele domangeshefelo kutya oku na endiki lofikola ha li yandje eetundi kovanafikola va hala okuxwepopeka oilongwa yavo yondodo onhi-11.
Va ti okudja opo ovanafikola ova tameka okukwatafana naye noku li shangifa tava futu oshimaliwa opo ngeno va pewa eetundi.
Opolifi oya hokolola tai ti ovanafikola ova kala noku li shangifa okudja muJanuali ashike ihava lombwelwa kutya otava tameke etundi naini naashi osha ka eta opo va kale va limbililwa.
Ota ku hokololwa kutya omufekelwa oye tuu ou konima eshi a kwatwa po vati okwa hangika yoo vali e na eembapila da kusha okukala moNambibia.
Omufekelwa oku li momake ovanambelewa hava longo noikwameni neameno lokeengamba omo vati eembapila daye tadi ningilwa omakonakono.
Opolifi oya kumaida oshiwana opo shi kale sha kotoka ngeenge tashi ke li shangifa keefikola dopaumwene shaashi okwa didilika ovanhu vahapu ve li ninga oikengelela yoku tula ovanhu mokatoo.
Oshiningwanima shikwao, ovalumenhu vavali ova kwatwa po Etitatu efimbo loufiku konima eshi va hangika neeshako 12 dombelela yeedingu doshifitukuti motuwa yavo mOutjo moshitukulwa shaKunene.
fhamalwa@nepc.com.na