Ehangano lyokulesha onkalo yombepo olya tengeneke Shiyenga shaNangombe yiga dhenge nawa okuza oshiwike tashiya miitopolwa yokonooli.
Omunongononi koshikondo shoku tengengeka onkalo yombepo moshilongo Richard Nashikaku okwa ti, omvula otayi ka loka nawa momasiku twa taalela miitopolwa yokonooli.
Nashikaku ta ti, okuza mEtiyali omvula okwa tegelelwa yi ga tilehi nawa, nopu na ompito onene yoku etelela efundja.
“Onkalo otayi ende tayi lunduluka yuuka kuuhwepo, oshowo kuuwanawa lela, ndyoka tayi gandja omukumo gomata” ta ti ngaaka.
Ta ti, iitopolwa yilwe moshilongo nayo oya tengenekwa tayi ka mona omata, nonando ya kala inaayi lokwa nawa omasiku ga piti.
“Onda lopotelwa natango omata omashona miitopolwa yilwe monooli,” ta popi ngaaka.
Ta kwashilipaleke kutya omvula oyi na okuloka natango, onkene aanafalama naya kale ye na omukumo.
Okuza mehuulilo shiwike, omata omashona oga loko koshitopolwa shaMusati, kombinga yokoongamba.
“Omikunda ndhilwe moshitopolwa shaMusati, odha mona omata gomvula nonando hago ngaa ngoka taga hokitha. Oshitopolwa shaHangwena osha tegelela okumona omata gomvula ogendji oshiwike shika,” ta fatulula ngaaka.
Ta ti, omata natango oga dhenge ngaa kiitopolwa yilwe kuununginino woshilongo.
Omunafalama Feneste Amutenya gwomomukunda Othingo okwiindile aanafalama aakwawo yomomapya ya yande okukala pookamba pethimbo ndika lyokulonga momapya.
Okwa popi kutya okwa koneke aantu oyendji taya dhenge ashike omangandja omanga ye na okukala momapya taya longo iipalutha yawo, omanga omvula tayi loko nawa.
Amutenya okwiindile aaleli yopamuthigululwakalo opo ku tulwe miilonga ompango ndjoka tayi thiminike oondingosho dhi kale dha pata pethimbo lyongula uuna aakwashigwana ye na okukala ye li momapya.
Thomas Ashipala ngoka a hokolola kutya okwasimaneka iilonga yomepya naye okwa indile epangelo li shunithe oondando dhomauhoho pevi opo aakwashigwana ayehe ya vule okwiilandela omauhoho yo yi ilikolele iipalutha ya gwana okuza momapya gawo.
“Ngele atuhe otu na omukumo nelandulathano miilonga yetu, otatu vulu okulonga sha gwana oku tu palutha noku kandula po ondjala. Ta ti, otaya vulu okuhuma komeho ngele taya longitha ethimbo miinima yongushu nopethimbo lyoopala.