Omvula oya ningi omasiku tayi loko nawa miitopolwa oyindji yokonooli.
Nonando ya loko nawa oya limbilike aakalimo yomOshakati naakalimo yomomikunda dha ndhingoloka ondoolopa ndjoka, sho omeya taga ende taga ningi ogendji, taya ti efundja.
Aakalimo yomolukanda Onawa mboka oyendji ya li ya tembundhilwako, otaya nyenyeta kutya oya falwa momeya.
Selma Shikongo okwa ti oombashu dhawo odha ndhingolokwa komeya, kayeshi we ngele Efundja nenge omeya gomvula.
“Elelo lyondoolopa nali tu tale, nali tu tile omahala ngoka gena omeya omavi,” ta nyenyeta ngaaka.
Titus Shivute okwa ti elelo lyondoolopa olya ndopa okugwanithapo iilonga yawo.
“Shika oshinima sha kehe omvula, kashi shi oshinima oshipe. Omagumbo ngaashi ngoka geli mEhenye oga kala nuupyakandhi womeya okuza ethimbo ga tungwapo,” ta popi ngaaka.
Ta ti, sigo opayife aakalimo otaya lili taya si omeya, nonando otaya iyithana yeli nondoolopa.
Omugandji gomauyelele melelo lyondoolopa lyaShakati Katarina Kamari okwa ti elelo lyondoolopa okwali lye yapo nomukanka goku enda omeya opo kaaga taandele okuya momagumbo gaantu, mo2021.
“Omukanka ngoka okwali gwa kwathele no nando inagu gu kandulapo uupyakandhi awihe, opo omeya ga landule omukanka ngoka gaye miishana ya kwatathana noontopa,” ta ti ngaaka.
Kamari okwa ti ota galukule Kundana kombinga yaakalimo yOkonawa, konima a mono uyelele wa shoka sha yokolwapo kaanambelewa aakuluntu.
Matias Timoteus gwomomukunda Othingo, muuninginino wOshakati okwa ti, omvula oya ningi oshiwike tayi loko kaayi na oluthuwo, omeya oga ningi ogendji.
“Ondi wete kutya efundja olyi li mondjila, oshoka omvula oya ningi omasiku ogendji tayi loko. Omeya mpoka kwa li twe ga thigi hapo we ge li nena, nonando okwali ya tsikile okuloka okupendukila ohela,” Timoteus a popi ngaaka.
Ta ti, otwa kala nokugalikana omvula yi loke, Pamba okwa yamukula omagalikano gawo.
Timoteus okwa ti iilya yawo otayi monika nawa no ya Papuka nawa.
Sheetekela Iyambo gwomolukanda Evululuko okwa ti, ombashu ye oyi li kohi yomeya.
“Kandi na nkene, otandi yi peni ngele onda yi ndi ka ze kookuume kandje, iinima yandje otandi adha ya yakwa mo koombudhi. Kandi na oshimaliwa sha gwana okututila pehala lyandje omavi, opo omeya kaage ye po we,” ta ti ngaaka.
Ta gwedha po ta ti, omeya ngoka ogomvula ashike, nena efundja ndyoka tali popiwa lya fa tali endele ko olya thiki, itatu si ngaa omeya nani? ta pula ngaaka.
Iyambo okwa ti, osikopa ye yiikutu oya nyanyuka po thiluthilu komeya, omanga iinima yimwe e yi londeka kiipakete yoombiila opo kaayi nyenge omeya.
Omvula oya li ya loko unene okuza oshiwike sha zi ko notayi tsikile natango okuloka.
Iishana oya udha omeya niimuna oya paluka nawa komalutu sho tayi li omwiidhi gwa talala nawa.
Sha ikwatelela konkalo yombepo, omvula onene oya tengenekwa tayi tsikile okuloka miitopolwa yomonooli.
vkaapanda@nepc.com.na