OKATANA – Nonando oyendji ya kala ya teka omukumo sho omvula ya kala omimvo itaayi loko nawa omimvo dha piti, omvula yotango yonuumvo oya tameka nomata taga etitha oonkondo.
Aanafaalama yamwe oya kala ye na eikwatopomutima kutya omvula nuumvo itayi loko mbala monooli ashike okuza oshiwike sha zi ko shiyenga okwe ga tilehi pevi miitopolwa oyindji yomonooli.
Kundana sho a li a talele po iitopolwa ya yooloka mehuliloshiwike mOmusati nOshana omvula oya loko nawa miitopolwa moka, shoka shi li oshinima oshiwanawa koyendji osho wo kiimuna. Maria Daniel gwomomukuna Okaku kaNangula okwa ti oshoka omvula yotango oya loko nawa oya ningi omukumo gokulonga omapya gawo mbala.
“Omvula oya lala tayi loko uusiku wEtitano, sho twa penduka otwa adha iishana yu udha omeya, ngele oya loko natango otatu tameka oondima,” ta popi ngaaka. Maria Shikongo, a yambukile momukunda Othingo okwa ti, omvula oya loko nawa mehuliloshiwike, ihe natango kegulu otaku gandja omukumo.
“Omvula oya loka nawa noya li ya sheka lwopotundi 04h00 lwaampoka Olyomakaya.
Egulu otali gandja omukumo, tali ulike oku za omuloka natango,” Shikongo ta popi ngaaka.
Shikongo ta ti, evi ngashingeyi olya nyuta nawa, nota longekidha nale okupululitha epya lye opo iilonga yetemo yi tameke kuyele. Ta ti, omimvo dha piti, oya kala haya thiki mokili ye na iilya momapya. Shikongo okwa kumagidha aanafalama ooyakwawo, ya tsikile okugalikana pamwe opo ya mone omulokwa omwaanawa nuumvo ya vule okulonga nawa momapya gawo.
Saara Shoolongela gomomukunda Onaushe moshitopolwa shaMusati okwa ti nonando omvula ya loko nawa omata gotango, okwa tegelela natango olweetho olutitatu opo a vule okulonga epya lye.
“Ondi na uutile natango, oshoka omvula ohayi ya nawa petameko e tayi shuna ishewe, shoka hashi hepitha oonkondo niimaliwa yetu, uuna iilya ya kukuta nokusa po,” ta fatulula ngaaka. Ta ti, nonando omvula inayi loka lela ngaashi shito, iishana oyi na omeya, nomwiidhi ogwa ziza nawa.
Iitopolwa yimwe yoshilongo otayi hokololwa nayo ya mona omvula nonando ohayi pititha po omasiku omanga omvula inaayi tsikila okuloka natango.
-vkaapanda@nepc.com.na