Ngashiingeyi omwaalu gwaaantu mboka ya monika ombuto yoCovid -19 ndjoka hayi etithwa komukithi gwoCoronvirus ogwa thikama paantu ye li 11 moNamibia.
Shika osha kolekwa komugandjimayele gwopaundjolowele Bernard Haufiku ngoka a ti kutya aakiintu yaali nomulumentu gumwe mboka ye li ayehe Aanamibia oya hokololwa ye na ondjokonona yolweendo lwokondje yoshilongo oya monika omukithi nguka tagu endelele muuyuni.
Omushangwamulombo ngoka gwa pitithwa kuuMinisteli wuundjolowele nonkalonawa ogwa hokolola kutya omuntu gumwe gwoomaantu yatatu mboka ya gwedha kaantu yahetatu mboka ye na ombuto ndjoka, omukiintu omunamimvo 35 ngoka ha kala moshilongo shedhina South Africa, okwe ya moNamibia momasiku 20 gaMaalitsa. Okwa li nduno a ka konaakonwa momasiku 24 gaMaalitsa sho a ulike omandhindhiliko gwomukithi ngoka nomayamukulo oga za mo taga ulike kutya oku na omukithi.
Omushangwa ogwa hokololwa kutya omalongekidho oga ningwa opo omukiintu nguka a kale a falwa kehala ndyoka hali ikalekelwa aantu mboka ye na omukithi ngoka.
Omukiintu omutiyali omunamimvo 33 okwa li a yi koDubai nomoEthiopia osho wo woJohannesburg muMaalitsa, okwa li a thiki moNamibia momasiku 17 Maalitsa, okwa li a yi koshipangelo nokwa monika kutya oku na wo ombuto ndjoka.
Omuntu omutitatu ngoka wo a monika ombuto ndjoka ngashiingeyi omulumentu gwomimvo 69 ngoka woo a li a ya koSouth Africa. Okwa li a monika omandhindhiliko gwombuto ndjoka naokwa li a yi koshipangelo kundohotola gwe gwopaumwene nokwa li a monika ombuto ndjoka. Ashike ngashiingeyi oku li kofaalama ye kOmaruru hoka a ikalekelwa nomukulukadhi gwe noku li mekwatathano nandohotola gwe kehe esiku ta tala kutya onkalo ye oyi li po ngiini.
Omushangwa ogwa hokolola kutya uuministeli ngashiingeyi otawu si oshimpwiyu kutya aantu mbaka oya ikalekelwa na itaya taambitha ombuto ndjoka kaantu ooyakwawo.