Omolwamuloka omwaanawa konyala monooli ayihe, aakalimo oya li ya penduka ongula yEtiyali taya kongo omweelelo miishana yomeya.
Oshifokundaneki shika osha li sha mono aalumentu naakiintu momikunda ngaashi Othingo nOniimwandi taya kwata omafuma.
Sindano Shivute ngoka kwa li ta kwatwa omafuma moshana shi li popepi nomukunda Othingo okwa ti omasiku ngaka osheelo shositola yiiyelelwa ke shi mo.
“Omanga omboga tayi mene nawa, otu li manga momafuma. Sho omboga tayi ka kuka noohi nadho odhe ya oshowo oontangu,’’ ta popi ngaaka.
Ta popi ta ti, oshimaliwa she shomondjato ohashi manwa po komweelelo, sho shoka ha galikana aluhe omvula yi loke oshoka oyi na omauwanawa ogendji.
Sirka Timoteus gwomOshakati okwa ti okwa kwata omafuma ge a ka landithe opo a mone sha shoku ka landela oyana omboloto.
“Otandi ka landitha omafuma gandje momalukanda moka, okapandi kamwe oke na N$30 ge li ko gane.
Omafuma oge holike, itaga kala po,” ta ti ngaaka.
Ta yolitha omutoolinkundana ta ti, “Ngele owe etha ongame ndi ga teleke ngame mwene, tandi ga tula uuselesese awuhe, e tandi ga landitha, aasamane oyendji momagumbo itaya ka hala we okulya mo uulalelo,’’ te shi yolo po.
Timoteus okwa ti, moshana iha kala mo ominute dha adha kuntano inaa kwata mo efuma.
“Okukwata omafuma onde ku shuwa omanga ndi na omimvo hamano, ndi li nakuku kOmpundja.
Osho kwa li osheelelwa shetu shakehe esiku ethimbo ndika lyomafuma,’’ ta popi ngaaka.
MOshiwambo ohaku ti, omafuma oge na okuzima tango opo ga vule okuliwa.
Aakwati yomafuma mboka sho kwa li ya pulwa ngele omafuma oga zima ngaa, Tadeus Nangolo ngoka kwa li naye ta kwata omafuma okwa ti shoka omapopyo ashike.
“Efuma efuma ashike, owu li wete ashike kutya ndika eshona nokuliwa, nenge otali vulu okuliwa,’’ ta ti ngaaka.
Ta gwedha po ta ti, hasho haya mana po ethimbo okukonga osheelelwa shawo ngaaka.
Aalumentu mboka ya li yaandhika taya tala omeya gefundja kEngela moshitopolwa shaHangwena oya ti, omeya ogendji unene okukwata oohi, onkene oya tegelela ga lote manga. vkaapanda@nepc.com.na