Kae Maṱunḓu-Tjiparuro
“Otjiṱiro Otjindjandja ihi tja tjitwa ozombura ngapi nḓa kapita? Okombanda ozombura esere nḓa kapita. Kombunda yanao Ovasouth Afrika ave kambura nowo vari ovavi tjinene notjira tjOswapo atji ripura okurwa.”
Inga oomambo nga zire motjinyo tjokakambe okeni, Omutjuṋikwa Hage Geingoba, Operesidenda ya Namibia, otja konḓengura ndja handjaukire motungovi. Posi ya otja korutuu ndwa tjangerwe kotupa twozombuze oritjavari okuza momberoo ye maru tja: “ondjivisiro ombukise ohunga nongurameno ye mOtjiṱiro Otjindjandja tjo 1904. Orutuu maru tja: “Omaindjambo nge hi nongunḓe nouatjiri ngu maye tjitwa kutja Operesidenda Hage G. Geingoba, mehungi re tji ya ri 15 ku Ndengaṋi 2023 pOsciences Po mEhi rOvafransose, wa tjere otjihoromende tjombangu yotjivara tja South Afrika, Oswapo tji ya rwisa, ya ri nouvi kombanda yOtjiṱiro Otjindjandja tji tja tjitwa i yEhi rOvandoitji komihoko vyOvakwena nOvaherero kamayakurua kaparukaze.” morutuu ndwi komurungu mwa raisiwa kutja Operesidenda Geingoba kenoruveze ndwa sasanekere ovitjitwa aviyevari mbi mehungi re. “Ovanamibia va ṋiṋikizirwe oure wozombura zokombanda yesere kehi yohuurire yOvandoitji ohino’ mbinḓu komutima nu kombunda kehi yotjihoromende tjombangu yotjivara ongune yotjitandi nomburuma onene. “Ovanamibia va pandjara omekurisiro nomakayendero wokomurungu nu ouhumandu kutja mbe kurira ohaṋi youmuhoko va paha okuungurira Otjiṱiro Otjindjandja okutwapo orutjiva pokati kOvanamibia,” orutuu ndwa tjangerwe kotupa twozombuze rwa posere nao. “Okuvetasana nomaheya, Operesidenda Geingoba ke na indi wa sasanekere otjihoromende tjombangu yotjivara tja South Afrika kOtjiṱiro Otjindjandja tji tja tjitwa i yEhi rOvandoitji kovimbumba vyOvakwena nOvaherero. Nokuhino ku sasaneka Otjiṱiro Otjindjandja tjOvandoitji kovimbumba vyOvakwena nOvaherero, Operesidenda tja tjitire uriri okuraisa otjouatjiri mbu ha paterwa pendje kutja tjingetjo otjihoromende tjombagu yotjivara tja South Afrika wina tja ri otjivi.”
Omambo nga ya posere ayoo ouhara wondanda yeraka ra Geingoba ya kwekururirwe oupapi nouparanga mOnamibia.