Auleria Wakudumo
Onamatanga – Minista wounamapya nounaimuna, eeshi, omeva nomatalululo omadu Inge Zaamwani okwa patulula pambelewa omboola yomeva momukunda Onamatanga Etitano.
Omboola yomeva oya tungwa kongushu yoshimaliwa shi fike peemiliona N$15 notai ka andjaneka omeva komaumbo e dule po250 momudinginoko waNamatanga.
Pefimbo ta patulula omboola pambelewa, Minista okwa holola kutya eshi oshili elalakano lakula lepangelo okuandjaneka omeva moshiwana unene komikunda, oko vamwe hava longifa omeva makaka ile ena oshimongwa shihapu efiku keshe.
“Oule wefimbo, ovakwashiwana vomomukunda Onamatanga ova kala hava longifa omeva ena oshimongwa ile va tutilwe omeva okudja kOutapi. Oproyeka ei oya kwashilipaleka kutya ovanhu ova mona omeva fiyo alushe,” Minista ta holola ngaho.
Eemiliona N$15 da longifwa okutunga omboola yomeva oda kwatela mo eesolar odo da kwatakanekwa nomboola yeemeta 150 okuya medu, epangelo ola tula po yoo okashina oko haka ifanwa ogenerata, eloli lokututa omeva ngeenge pena omhumbwe naikwao ya wedwapo.
Minista okwa ti omboola ei itai ka kwafela ashike ovamukunda ashike otai ka kwafa yoo ofikola, okapangelo kanini oshoyo oshitaasi shopolifi pomudingonoko.
Zaamwani okwa indila ovakwashiwana va file oshisho omboola yavo opo i dule okuvakalela.
“Ngeenge otwa pitike ehanauno lomaliko etu fyeevene, nena ohatu shunifa exumokomesho letu monima fyeevene. Otwa pumbwa okukala ofye omesho etu vene,” ta holola ngaho.
Minista okwa ti nantango oshilongo onghene tashi twikile omashongo omeva, taa etwa koukukutu wedu olo ihali dulu vali okukwata omeva oule wefimbo oshoyo ehapupalo lelongifo lomeva momaumbo, mounamapya nounaimuna.
“Ovanambelewa okudja kombelewa youministeli wounamapya oshoyo NamWater ova hovela nale okulonga moitukulwa ya yooloka, mwa kwatelwa Oshikoto opo ku kandulwe po enota moshiwana,” Zaamwani ta ti.
Okwa ti okutunga emboola moshiwana otaku yandje omhito okutameka oukunino vomomaumbo nokukandula po ondjala mokati kavo.
Ngoloneya woshitukulwa shaMusati, Immanuel Shikongo okwa holola olupandu kovakalimo vOnamatanga eshi va kala veli didimika oule wefimbo omanga epangelo tali tungu omboola ei.
“Ohandi mu indile amushe nena opo mu kwate nawa omboola ei nokuifiila oshisho. Ohandi indile yoo oshiwana shi kale sha kotokela ovo haveya okuhanauna nokuvaka ko oilongifo yomboola,” Ngoloneya ta indile ngaho.