Auleria Wakudumo

Omunandjungu mopolitika Michael Amushelelo oo a kufwa eemililona N$13 kepangelo, eetuwa dondilo heyali, eumbo naikwao, okwa ti okwa tungifa eefikola nokukwafela oshiwana momikalo da yooloka omanga omavalulilo aye okeembaanga inaa kukutikwa. 

Kuyele omwedi ou, oweeti woihokololandjai wepangelo okwa longifa okatendo kokukeelela oulingilingi wa longekidikika taka ifanwa (Poca) okupula omhangu opo i kufe ko omaliko aeshe aAmushelelo oo he liufana “The People’s General”.

Oihauto mwa kwatelwa oMercedes-Benz AMG E63S, Mercedes-Benz AMG A45, Range Rover Sport 5.0 V8, Audi Q3, noAudi A4 neeBMW di li mbali, osho yo eeakaunda deembaanga di li 13 odo da hangwa adishe kumwe di na eemiliona N$13, oda kufwa ko mEtitano. Prosecutor Martha Imalwa oo a pula omhangu i kufe ko omaliko aAmushelelo okwa ti omaliko oo neemiliona oda oda li da ongelwa sha pitila mekosho loimaliwa okuhafuta oifendela yokongulun nomokukengelela. 

Meenghundafana naKundana, Amushelelo okwa ti moule wodula imwe, manga epangelo inali pata eeakaunta daye adishe mo2019, okwa hangwa a yandja omakwafo vati keefikola di li nhano odo ta dimbuluka. 

“Eefikola odo nda tala tete nonda mona kutya oda pumbwa ekwafo, eefikola odo nda fikola nonda tala kutya oda tunga nge opo ndi ninge omunhu ou ndi li monena,” Amushelelo tati. Concordia College mOvenduka oya li ya mona oshimaliwa N$150 000 osho sha longifwa okutunga oluumbo lofikola. 

Moses Van Der Byl Primary, opo Amushelelo a fikola eendodo dopedu, okwa yandja vati oshimaliwa N$150 000. 

“Ngeenge owa tula kumwe oshimaliwa nda yandja keefikola mbali oN$300 000. 

Onda longa shihapu eshi nda li omilionela. 

Oudjuu wovanhu osheshi ashike v ena outondwe naame tau imbi va mone ouwa ou nda longela oshiwana,” Amushelelo ta ti.  

Amushelelo okwa ti ina yandja ashike oshimaliwa keefikola mbali shaashi oko a fikola, ndele okwa twikila nokuyandja omakwafo ngaashi, Ricardo Mannetti Foundation N$150 000, Okahandja Secondary N$25 000 noRocky Crest Primary N$25 000. “Omakwafo aeshe nda yandja e li koshi yoN$25 000 inandi a didilika shaashi omashona, onde a tala ko a fa oshendja,” ta ti.

Amushelelo okwa pula kepandja loinstagram oohandimwe ta ti: “ove nokafele koye owa longela shike oshiwana?” 

Okwa weda po ta ti vati ino pumbwa okuteelela u ninge omilionela opo u yandje ekwafo koshiwana. 

-wakudumoauleria@gmail.com