Omupresidente gwoshilongo Hage Geingob sho a popitha oshigwana shaNamibia lwotango nuumvo sho a shuna ko koshipundi oshikando she oshitiyali e te ya lombwele shoka unene sha ganithwa muule woshikako she shotango sho e li omupresidente gwoshilongo.
Geingob okwa hokolola kutya pethimbo ndyoka a li omupresidente molweetho lwe lwotango okwa pondola okushunitha iipotha yokulunga itapula pevi, shoka nokuli sha kaleka oshimaliwa shi thike poobiliona N$4 dha kalekwa moshiketha shepangelo.
Okwa ti kutya ndhoka odha li dha kalekwa unene pethimbo ndyoka sho a kaleke opoloyeka yokulundulula onkalonawa yokapale koondhila ndjoka ya li tayi hu epangelo oshimaliwa oshindji shoobiliona N$7.
“Shika osha lwithwa unene pethimbo ndyoka oshikonga shedhina National –Anti-Corruption strategy sha ya miilonga. Otw ali twa kutha omatokolo notatu tsikile okukutha omatokolo,” osho a hokolola ngaaka.
Okwa ti kutya ye okwa kondjitha okulunga itapula nale unene okuza momumvo 2018 sho a li a pula oominista dhe dhi yamukule omapyopyo gwokulunga itapula ngoka ga li tage ya popilwa, nomayamukulo gawo oga li ga thindilwa kombelewa yo-ACC ndjoka tayi ungaunga niipotha yoludhi ndoka.
“Etokolo lyokukaleka opoloyeka yokulundulula onkalonawa yokapale hoka koHosea Kutako International Airport oly ali lya falwa koompangulilo noshipotha shoka otwa li twe shi kanitha , e tatu ka indila ishwe kompangu yopombanda opo li ye miilonga,” osho a hokolola ngaaka sho ta popi shoka a ninga methimbo lya piti.
Okwa tsikile ko ta ti kutya ngashiingeyi oku na oominista mbali ndhoka dhi li mondholongo oomweedhi heyali sho tadhi pangulilwa okulunga itapula na ye onga omuleli e li pombanda inaya mo moshinima shoka.
Geingob okwa popi ta ti nonande okwa longo ngaaka oshilongo oshi li natango sha taalela omashongo ogendji ngaashi okuhe na iilonga mokati kaagundjuka , eliko tali tengauka noshowo okulongitha oshindji miipumbiwa yoombelewa dhepangelo.
“Omalongekidho ogendji nomalakano ogendji ngoka ga li ge li momusholondondo gwepangelo onkene ngaa ga yiwa moshipala komukithi ngoka gwa ponokele uuyuni okuza muDesemba, nangashiingeyi osha dhigupaleka onkalo opo omalakano ngoka ga lalakanenwe,” osho a hokolola ngaaka.
Okwa ti kutya ye okwa longa nuudhiginini mokushonopaleka elelo ekuluntu mepangelo ngaashi oominista, nomwaalu ngoka maantu mboka a ulika ogwaakiintu.
“Elalakano lyokushonopaleka elelo lyepangelo okukaleka po oshimaliwa moshiketha shepangelo noku shi longitha miipumbiwa yonkalamwenyo yaaNamibia mboka ya pumbwa oonkalamwenyo dhawo dhilundululwe,” osho a hokolola ngaaka.
Okwa hokolola kutya otashi ye mateke unene sho aakwashigwana yaNamibia yalwe inaya hala okwiimanga uukuni kumwe mokukaleka po Namibia ewanawa onga oshilongo muuyuni.
Nonande opu na mboka inaya hala oku imanga uukuni kumwe, Geingob okwa hokolola kutya onkalo yondjala moshilongo oya shonopala, naashoka sha shonopeke onkalo ndjoka, ooshoka kutya epangelo ngashiingeyi olya ukitha oonzo miikondo mbyoka ya pumbwa okunkondopalekwa pamukalo gwoshimaliwa opo li andjaneke omakwatho kaakwashigwana.
Okwa ti muule ashike wethimbo 2015-2019 aantu ye thike 564,983 okuza kiitopolwa 14 moshilonga oya lola uuwanawa woonzo dhoshilongo shika okupitila mopoloyeka yedhina Food Bank ndjoka ya kala tayi gandja iikulya kaakwashigwana mboka ya sa ondjala moshilongo.