OSHAKATI – Erick Ndakolo weedula 56 oo a ninga omafiku 18 ta nangala pombila yaina momaendo omolukanda laUupindi mOshakati okwa shuna onghela keumbo.
Ndakolo okwa tokola a shune keumbo konima eshi a popiwa naye kopolifi oyo ye mu kumaida noku mu lombwelwa opo a shune keumbo molwaashi pomaendo kape na eameno notapa dulu okutula omwenyo waye moshiponga.
Omulumenhu ou okwa li ha nangala pombila yaina konima eshi vati ya tewa nokukufwa oshipambu shemanya kuwalye.
Ina okwa xulifa momudo 2003 ashike emanya kombila ola tulwa ko momudo 2017.
Ndakolo ou e li omunambelewa wopolifi mukulu okwa yelifa ta ti ye ita vele momutwe.
“Onda uda nai eshi va longela ombila yameme omunyonena. Onda ninga onghendabala opo ndi tonatele ombila yememe efimbo keshe,” ta hokolola.
Okwa weda po ta ti elalakano okukwashipaleka kutya ombila yaina oi li meameno.
Okwa ti kakwa li shipu okuongela oshimaliwa shokutunga emanya kombila yaina.
Omulumenhu ou okwa li ha nangala mokatenda mu na etalashe nosho yo eembiya dokutelekela.
Okwa li a dika omafiya popepi nombila yaina.
Ndakolo okwa etelela outa noikuti needibo komaendo nelalakano lokuliamena kookalyamupombo.
Okwa ti okwe lipyakidila nokuongela oshimaliwa opo a dule okulanda eedopi dokufitika eembululu opo pa kufwa eedopi.
“Ohandi indile moshiwana opo shi yambidide noshimaliwa shokulanda eedopi nokulanda odalate yokuninga oluumbo lombila.
Okwa weda po ta ti naau ta dulu oku mu pa eedopi okwa manguluka okuyandja.
Oshiningwanima eshi okwa li kumwifa ovakalimo womolukanda Uupindi molwaashi inava mona nale omunhu ta nangala momaendo.
Pefimbo ta popi noshiwana komaendo onghela, komufala wopolifi moshitukulwa shaShana Commissioner Naftal Lungameni Sakaria okwa kumaida oshiwana opo shi xulife po okuteya eembila dovanhu.
“Omunhu keshe ta ka monika ta longele eembila dovanhu ominyonena na lopotwe opo a dule okukala a patululilwa oshibofa,” Sakaria ta ti.
Okwa weda po ta ti ope na okatendo ke li mopolifi ke na sha nokulongela ominyonena eembila, naashi otashi eta opo omunhu a kwatwe po.
Okwa ti oshiwana nashi longele kumwe okukondjifa oimbuluma momidingonoko dasho.
– fhamalwa@nepc.com.na