OKAHAO – Omulumenhu weedula 46 e na oudu wopamadilaadilo, ota hokolola ta ti okwa dipaa xekulu a dala ina pefimbo a li a fiwa po komadiladilo, shaashi a ninga omafiku atatu ina nwa omiti daye domukifi wopamadiladilo.
“Naame inandi panda eshi nda dipaa tatekulu. Paife opo ne handi shi lipula eshi nda nwa omiti dange kutya mboli onda ninga oshiima sha puka,” Simson Mosatigo ta hokolola.
Omukulupe Shiimi Shivute weedula 82 vati okwa tetaulwa nomakatana fiyo omefyo kuMosatigo mexuliloshivike komukunda Oshilulu moshitukulwa shaMusati efimbo lomutenya.
Omufekelwa ou okwa holoka momhangu kuyele oshivike eshi. Omukulunhu koshikondo shokukonakona oimbuluma mOmusati omupedukomufala Moses Simaho okwa hokolola ta ti oshibofa shaMosatigo osha undulilwa komafiku 8 Sepetemba 2023 konima eshi a holoka momhangu yaKahao Etivali.
Opolifi oya ti omutamanekwa ota ka ningilwa omakonakono opaunamiti.
Opolifi oya hokolola tai ti Mosatigo naShivute ova li tava tete po omuti u li mepya nokonima a tanaukila po xekulu noku tameka te mu tetaula nomakatana komutwe lwoikando ihapu.
Opolifi oya hokolola tai ti Shivute opo a xulifila ponhele opo molwaashi okwa li vati a tetwa a monifwa oshiponga nomutwe. Shivute okwe lituwa a xulifa komutekulu i lili pefimbo kwa li te mu twaalele oshikundu. Pefimbo a kwatafana naKundana, Mosatigo okwa koleka ta ti okwa nyeka ko ekatana laxekulu noku mu tetaula nomakatana ndele ta i meumbo lavo li li oushiinda naShivute. Okwa hokolola ta ti okwa ninga oshiimi ehe shi eshi ta ningi molwaashi omadilaadilo kakwa li e li ponhele, onghee okwa hala okumangululwa modolongo opo a shune keumbo. Okwa ti eshi oshi li oshikando shotete ta longo oshimbuluma momukunda wavo shaashi nghee ngaa a tamekele momudo 2008 okuvela oudu wopamadilaalo ina longa nale oshimbuluma.
“Ngeno onda nwine omiti dange ngeno inandi dipaa tatekulu. Ovaneumbo vange navo ova dopa oku ka tala omiti dange pefimbo,” Mosatigo ta weda po.
Ofamili yaMosatigo oya hokolola tai ti ova kumwifa koshiningwanima sha longwa kuye molwaashi ina kala shito a kwatwa komhepo yokulonga oimbuluma, no nande e na oudu wopamadilaadilo. “Ina kala shito he tu pe oupyakadi. Okushivike nawa momukunda wetu ongomulumenhu e na elandulafano,” mumwainamati Naftal Kapadhi ta hokolola.
Mumwainakadona Claudia Kapolo okwa koleka ta ti omiti daMosatigo okwa li da pwa po onghee okwa hangika ashike opo kwa li ta i koshipangelo a ka tale omiti daye.
fhamalwa@nepc.com.na