Oombelewa oonene dhoshitopolwa shaMusati odha tseyitha kutya omulilo ngoka gwa kala tagu fike konyala iiwike iyali kOmusati osho gwa dhimi thiluthilu. 

Omugandji gwomauyelele moombelewa onene dhoshitopolwa shaMusati Simeon Kandjala okwa ti omulilo ogwa dhima thiluthilu. 

“Aanambelewa mboka ya li ya falwa momakuti oku ka dhima omulilo oya galuka komagumbo,” ta ti ngaaka. 

Omulilo ngoka gwa mbugaleke ogwa halakanitha wo iimuna mombuga nokuhinga mo iiyamakuti. 

Oongoloneya yiitopolwa yokonooli, Omusati, Oshana osho wo Oshikoto oya kunkilile oshigwana shi kale uupathi wiiyamakuti ya zi mEtosha osho wo momahala gi ikalekelwa omolwomulilo ngoka gwa ningi esiku tagu fike. 

Aanafaalama mboka ye na oohambo dhawo kombinga hoka otaya nyenyeta iimuna yawo ya halakana komulilo ngoka tagu fike, onkene sigo oompaka kaye na uuyelele ngele iimuna yawo oya pya po nenge oyi li ashike mombuga. 

Omugandji gomauyelele muuministeli womidhingoloko nomapashiyono Ndeshipanda Hamunyela okwa ti omuloka gonuumvo, ogwe ya nomauwanawa ogendji, moka mwa kwatelwa omwiidhi kehe pamwe. 

“Omolwombepo ndjoka ya tameka kuyele nuumvo, omililo nadhi kwatwe nawa, okuyanda embugaleko,” ta kumagidha ngaaka. 

Hamunyela okwa kumagidha oshigwana shi kwate omulilo nuukeka okuyanda epeya osho wo ekanitho lyiimuna osho wo oomwenyo dhaantu. 

Ta ti, oshigwana nashi kale sha ndhindhilika kutya omulilo ohagu taandelekwa kombepo, onkene nashi kale tashi kondolola omililo uuna tashi tema okukwashilipaleka kutya omulilo ogwa dhima thiluthilu. 

Ta ti, okukeelela okuvule okupanga, onkene ngele shika osha keelelwa itashi holoka. 

“Omulilo ogu na okukondololwa opo kaagu holoke, shika nashi tameke nakehe gumwe. Oshigwana nashi kunkule omwiidhi pooha dhomagumbo osho wo kehe pehala omulilo tagu vulu okuandjakana gu ete epeya,” ta popi ngaaka. 

-vkaapanda@nepc.com.na