Lazarus Hakwaake
OHANGWENA – Ounona voumati ve fike 30 mosekondele Ongha ova fiwa pomutenya eshi omuhandjo wavo wa lungunifwa po kondalu yanelyanga. Omukulunhufikola Simon Nghituwamhata okwa popya kutya omatalashe e fike 220, eembete 10 oshoyo omambo ovanafikola okwa pya po filufilu. Oshinima eshi osha fiya ounona pomutenya, nosha fininika elelofikola opo li kufe onghatu nokufininika ounona monduda yokulila onga omuhandjo upe wopokafimbo.
Omukulunhufikola ota indile kovaSamaria ovanamutimanghenda oshoyo omahangano eeshali e va tondokele po pakuyandja omakwafo opaulumomhumbwe opo ku kwashilipalekwe kutya elihongo lounona va kumwa inali iwa moshipala, osho tashi dulu okudala oidjemo ya utama. Okwa popya kutya ofikola oi li momhumbwe noya pumbwa omatalashe, eetenda oshoyo eembete opo va ete po omuhandjo upe weetenda.
Ovanambelewa okudja kombelewa yopashikutulwa shOhangwena ovo ve na sha nomaupyakadi opaushitwe ova talela po ofikola nova yandja omayele kutya omolwa onghalo yokufu, ofikola inai pumbwa oku ninga eetenda onga eenhele doku nangala efimbo eli omolwa outalala, ova indila opo etenda di longifwe onga eenhele dopakafimbo doku hongela ounona. Ova popya yo kutya etenda kadi na eameno lawana otashi shiiva okalyamupombo veli teyaulilemo noku vakapo oinima younona, shimwepo ova didilika tashi dulu oku tula onghalamwenyo yovahongwa moshiponga osho omayoka oshoyo eenghwe odo hadi eta omalaria osho ovanambelewa vati. Ova udaneka kutya ombelewa otai ka yandja eetenda, nova kunghilila ofikola i longife eetenda onga eengulu dokuhongela opo onghalonawa yovanafikola i kalekwe po.