Ondando yomahooli gopetolola otayi londo pombanda noN$2.50 omanga yodisela tayi londo N$1.50 molitela yimwe okuza mEtitatu lyoshiwike shika.
Omupevi minista yoomina noonkondo Kornelia Shilunga okwa tseyitha ongula yOmaandaha kutya iiyeti mbyoka ya thiminike opo omahooli ga gwedhelwe oyo epulo lyomahooli muuyuni kaalongithi yago.
“Omahooli ohaga lunduluka kehe omwedhi, sha ikolela komayalulo, kutya otaga yi pevi nenge otaga yi pombanda,’’ ta ti ngaaka.
Uuministeli wiikwamina noonkondo omwedhi gwa yi owa ti oondando dhomahooli odha londa molwaashoka oondando dhomahooli inaga dhindwa nandho odha londo.
Owa popi momushangwa kutya oshigwana nashi kale sha ngungumana nonando oondando dhomahooli tadhi tsikile okulunduluka.
Omahooli oga kala taga lunduluka omwedhi kehe okuza petameke lyomumvo nguka.
Moonkundathana naKundana omuhingi gotaxi Samuel Negonga okwa ti, ngele otashi tsikile ngiika, nondando dhotaxi nandi gwedhelwe.
Negonga okwa li a popi ngaaka sho kwa li a pulwa opo a gandje omayiuvo kombinga yegwedhelo lyomahooli gomwedhi gwaJuni.
“Otatu longo nuudhigu, ookasitoma kadhi hole okufuta nale ondando ndjoka ya pitikwa, N$13. Oyendji ohaya ti ashike oye na ashike N$10 naampoka pe na iinano iile,” ta nyenyeta ngaaka.
Ta ti, omahooli otage ya longitha nuudhigu, oshoka ohaya ka kwatwa kombepo yoku ka landa omahooli gokoAngola ngoka inaaga pitikwa moshilongo.
Maria Shikongo ngoka ha longo pomahooli goNamcor mOshakati okwa ti, egwedhelo lyomahooli olya shunitha ookasitoma dhawo monima.
“Ethimbo nda tameke miilonga muka, tandi elekanitha nongashiingeyi ookasitoma itadhi ende ngaashi dha kala petameko, odha ningi oonshona, oshoka yamwe otaya kambadhala okukonga mpoka pe na ngungula,” ta ti ngaaka.
Ta gwedha po ta ti, shoka osha etele aanilonga yopomahooli oyendji etilo lyokukanitha iilonga oshoka ookasitoma ngele kadhi po otaya lalekwa miilongwa. – vkaapanda@nepc.com.na