Victoria Kaapanda
ONGWEDIVA-Omawuliko giipindi ngoka haga kala ko omumvo kehe, naaluhe momwedhi twa taalela Mai, taga ithenwa Oshakati Totem Expo, ope na ompito ga undulilwe koomwedhi dhokomeho nenge ga kalekwe omvula ndjika.
Omukwatakanithi gwomawuyelele mombelelwa yelelo lyondoolopa yaShakati Katarina Kamari okwa ti okangundumutima ta ka longekidha omawuliko giipindi, opo manga ta ka kundathana nokutokola kutya oshike shi na okuningwa po nonande yena ngaa edhilaadhilo lyokukaleka omawuliko giipindi, go ga tsikile ashike omvula tayi ya.
Kamari okwa ti shika otashi ka ningwa omolwokukeelela omukithi gwa nika oshiponga gwo Covid-19, ngoka tagu vulu okutaandela unene uuna pehala pe na aantu oyendji nenge ya gongala ngaashi naana omawuliko giipindi haga kala ge na aantu oyendji.
“Mboka ya adhika ya ninga omayindilo oshowo ya adhika ya futa nale, ihe ekaleko lyomawuliko giipindi tali yi miilonga, otaya ka pewa imaliwa yawo,” Kamari a popi ngaaka.
Omawuliko giipindi natango haga kala ko omvula kehe taga ithanwa Ondangwa Trade Fair ngoka kw ali ge na okukalako momasiku 27 gaApilili nuumvo oga kalekwa.
Omugandji gwomawuyelele melelo lyondoolopa yaNdangwa Petrina Shitalangaho, okwa ti omawuliko giipindi gomvula ndjika oga kalekwa.
“Shika osha kwatele mo uulalelo wowina wokugongela oshimaliwa mboka wa li wu na okuningwa momasiku 28 gaMaalitsa nuumvo. Elelo lyondoolopa otali ka tseyithila oshigwana komasiku gokomeho kutya omawuliko giipindi gwomvula tayi ya otaga ka kala ko uunake,” Shitalangaho a popi ngaaka.