Osipana yomaudhano gokoompadhi KK Palace oya shayina etsokumwe nelelo lyondoolopa lyOndangwa, nelalakano lyokunkondopaleka omaudhano mondoolopa. 

Omugandji gomauyelele melelo lyondoolopa lyOndangwa Petrina Shitalangaho-Mutikisha okwa ti, etsokumwe ndyoka otali ka xwaxwameka omaudhano getanga lyokoompadhi osho wo okuhumitha komeho ondoolopa yOndangwa. 

Okwa fatulula kutya etsokumwe ndyoka olyomvula yimwe, notali kala tali ningululwa sha ikwatelela komayihumbato okuza koombinga adhihe. 

“Okupitila metsokumwe moka, elelo lyondoolopa lyOndangwa olya gandja omagano oshimaliwa shi thike N$350 000 kosipana yo-KK Palace,” ta ti ngaaka. Shitalangaho- Mutikisha okwa totha mo wo kutya osipana ndjoka yo-KK Palace oya kala nokudhana nawa momaudhano ga zi ko, nongashiingeyi oyi li komeho moNamibia Premier League. 

Ta gwedha po kutya elelo lyondoolopa osho wo aakalimo yomOndangwa oyu uvite uuntsa omolwa ya kala nokudhana nawa opo ya ye ponkatu mpoka ye li paife. 

“Otatu tsikile okugandja omukumo nokuyambidhidha omaudhano shoka tashi ka tula wo  ondoolopa yetu ponkatu yimwe yi ili,” ta popi ngaaka. 

Ta gwedha po kutya , elelo lyondoolopa otali kala tali gandja iikwathithilonga okuxwaxwameka nokuulika omahangano agehe gaali. 

Naashoka ota shi ka ningitha osipana KK Palace a kale oye mu kwatelikomeho nomuxwaxwameki gwelelo lyondoolopa yOndangwa. 

“Shika hasho oshikando shotango elelo lyondoolopa tali yambidhidha omaudhano, olya kala nokuyambidhidha omaudhano ngaashi etanga lyomokambamba osho wo omaudhano gokoompadhi,” ta fatulula ngaaka. 

-vkaapanda@nepc.com.na