Elelo lyondoolopa lyOndangwa olya hiya aakalimo mOndangwa opo ya kuthe ombinga mewapaleko ndyoka lya tameke momasiku 06 no tali ka hula momasiku 10 gaKotomba nuumvo. 

Omugandji gomauyelele melelo lyondoolopa yOndangwa Petrina Shitalangaho-Mutikisha okwa kumagidha oshigwana ashihe opo shi kuthe ombinga okwoopaleka ondoolopa omasiku ngoka. 

“Elalakano lyokwoopaleka okukaleka ondoolopa ya yela. Pehala ngele opwa yela aantu ohaya kala po, sho osho hatu kutha aluhe esiku lyokwoopaleka atuhe,” ta fatulula ngaaka. 

Tati, okwathanekaEtitanoku ka gandjwe omapapa kiikondo mbyoka ya opaleka dhingi, nokwa pula ekuthombinga lyaakalimo, aanangeshefa, oosikola , omahangano niikondo ya yooloka yopaumwene noyopapangelo ya vule okumona ompito okusindana. 

Shitalangaho-Mutikisha okwa kunkilile nomuthindo kutya ekako oshinima oshiwinayi onkene uuyogoki nawu kale oshinima shotango. 

Okwa kumagidha oshigwana kutya, esiku ndyoka inali kala olyo tali opalekitha ondoolopa, ihe nashi kale onkalondjigilile noshiholelwa shokwoopaleka aluhe. 

“Ondoolopa yOndangwa ohayi longekidha ewapaleko lyoondoolopa alihe omumvo kehe osho wo komahala ga yooloka,” ta ti ngaaka. 

Shitalongaho-Mutikisha okwa fatulula kutya ohaya longekidha ngaaka nelalakano lyokukaleka ondoolopa ya yela. 

Ta ti, uuyogoki owa simana onkene oshigwana oshi na okukala tashi opaleke omalukalwa gasho osho wo omidhingoloko dhasho opo ku yandwe omikithi tadhi vulu okupitila moongaga. 

Ta kumagidha oshigwana shaNdangwa kutya, nashi kale sha tula uuyogoki komeho. 

“Ondi inekela kutya kehe gumwe okwa hala ondooloopa ndjika yi hume komeho, pamukalo gwomayakulo ga yooloka, ihe shoka otashi ningwa ashike uuna ondoolopa ya yela, oshoka kape na ngoka ta hala okweeta ehumokomeho mehala lya gagala,” ta ti ngaaka. 

Selma Kambinda omukalimo gomOndangwa okwa ti nonando ohaya opaleke kehesiku, natango osha simana okuopaleka ayehe oshita. 

“Otandi kumagi dha aakalimo aakwetu opo tu kale ke omahala getu ga yela oku kaleka po uundjolowele wetu wo,” ta kumagidha ngaaka. 

Kambinda okwa indile wo elelo lyondoolopa opo okuopaleka hoka ku kale taku ningwa omwedhi kehe. 

-vkaapanda@nepc.com.na