ONDANGWA- Koshitaashi shopolifi yaNdangwa okwa patuluka ombelewa yokuyandja omikanda keetuwa noshoyo okuyandje ouyelele ngeenge otuwa tai ningilwa omapekapeko. Omukulunhu wopolifi moshitukulwa shaShana Commissioner Naftal Sakaria okwa patulula ombelewa ei pambelwa onghela.

Ovanhu nale moshitukulwa shaShana okwa li hava ende oshinano shile okudja koikandjohoololo ya yooloka tava ka konga omayakulo kombelewa i li koshitaashi shopolifi kOshakati. 

Paife ei onghundana iwa kovanhu hava di kombinga yaNdangwa molwashi paife itava i vali kOshakati okukakonga omayakulo okuyandja omikanda deetuwa. Sakaria okwa ti ombelewa yaye itai lalakanene ashike okulwifa oimbuluma moshitukulwa ashike natango otai lalakanene yoo okuyandjaneka omayakulo opolifi popepi noshiwana.

“Ovanhu ova pumbwa omayakulo ngaashi oitaashi yopolifi i li popepi neembelewa dokuyandja omikanda keetuwa ngaashi naana ei twa patulula onghela,” ta ti.

Okwa pula oshiwana opo shi longife omayakulo taa yandjwa kombelewa ei nokuliufa komilandu da tulwa po kovanambelewa tava ka longela mombelewa.

Okwa yelifa ta ti ombelelewa otai yandje omayakulo ngaashi okutala ngeenge omunhu ta landifa otuwa oye tuu mwene wayo, okutala ouyelele wotuwa ngeenge kwa li ya vakwa po ile ya longifwa poshimbuluma wonhumba.

Sakaria okwa li a enda pamwe novanambelewa wopolifi va dja koikondo ya yooloka omo e va lombwela opo va twikile okuyakula nawa oshiwana.

“Osha fimana ngeenge ovapolifi ve na ekwatafana liwa nelongelokumwe nopolifi molwashi otashi kwafele okukandeka oimbuluma,” ta ti.

Efiku olo Sakaria, okwa pula oshiwana shi fikama okuninga okafimbo kelimweneno nalalakano lokuyandja efimaneko komunambelewa wopolifi kwa li ta longo onga omuliyambi Jacob Omulaule Hamutenya, ou a xulifa Osoondaxa.

-fhamalwa@nepc.co.na