ONDANGWAS – ǁNāti ī ǁkhowa-ams auton daob ǁgaragu ǂgaoǀkhādi ai ra dīǀoaǀoa !khaisa mûǂams di beros dis Ondangwas !nâs ge, beros ǀguisa ǁgaus ai hâ tama hâ, xawe ǂhanub di ǁgui-aisens ǂhâbasa !oabade ǀhûhâsigu a sī!nâǁkhāse mās disa. 

Oshana ǀkharisi komisareb, Naftal Sakariab ge nē ǂanǂansa ge dī, ǂhanusiseb nē berosa ǂoa ge wekheb tsoatsoas ai Ondangwas !nâ gere ǁkhowa-am soab ai ge dī. 

“Nē ǀasa beros ǀkha da ra ǁgūbas ge ǁgâib hîa da auton !oabade ra sîsenū ǂgao ǁanǂgāsaben ai ra ǁguiba ǀoroǀorosa, ǁîn nēs ai!â gaxu !naride Oshakatis ǀAwa!namn Beros ǁga autona daob ai sī-ūs mā-ams !aroma gere !nari amaga,” tib ge ge mî. ǁÎb ge mîs ge, ǀasa beros nî ǂhâǂhâsa !oabade Ondangwas tsî ǂnamipeb ǁanǁgāsabena hā-ūbasa, tsîn nēs ǀkha maris tsî ǁaeba nî sâusa. 

“Nē beros ge ǁaeb ai tsî ǀgau rase xūna dis ǀguis ai dīǀoa tide, xawe nî ǂkhâ!nâse ī ai!gû ra dītsâdi ǂkhawadība ǁkhaes didi, ǁawoǁawos daob !norasasib ǁgaraga !gôa!gâs dis tsî !hū!nāsi daob !norasasib ǁgaraga hoaǁae ǁnâuǀnams tsîna,” tib ge gere ǀgonǀgon!gao. 

Sakariab gere ai!â mîs ge, texnoloxiba ǁîb ǀoasasib !nâ sîsenūs tsî ǀgūse khoena !oabade hā-ūbas ǀkhan ge ǀawa!namna ǀgaisa ai!gûsa ra dī, ǁîn di ǁguiǂams in khoesi ûigu tsî ǀhonkhoe-ain a xūna ǁkhaubas dis !nâ, ǀhûhâsib nî ǂgaoǀkhāsa tsî ū!oasa ǀgaugu !nâ tanisen !khaisa mûǂam tsî ǂhanusi ǁgaraga !khōǀgarasa. 

Nē ǀasa beros ge komputerdi hîa N$18 799 ǁkhāsiba ūhâdi, Jan Japan Motors xa ge ǀkhaeb ase māhedi ǀkha ge ǀoaǀoahe. 

Sakariab ge ǀhûhâsib ǁanina ge ǂgan, in nē berosa ǁîn !gâi!gâb kōse sîsenū tsî ǂhâbasa !oabade ǁaeb ai !khō!oa. ǁKhā ǁaxasib tawab gere gowaǀî soab aib ge Ondangwas ! Ā!khōmais ǀ Awemā !nans ǂgiǂgosi ǀawemā-aob, Nicodemus Amadhilaba ge mî, ǁanǂgāsaben !gôagu ra ǀarosens kōses !āsa ra ǂapaǂoasa tsî ǁnā-amaga ǂgaoǀkhāsa !oabadi ǀgūse nî hōhe ǁkhāsa ra ǂgaoǀkhā !khaisa.