Omupresidente Netumbo Nandi-Ndaitwah okwa ti ota ka longa noudinini okukelela oulingilingi, okuandjaneka omayakulo koshiwana, okulwifa ondjala noluhepo nosho yo okuyambula po eliko loshilongo.
Nandi-Ndaitwah okwa li ta popi Etitano pefimbo kwa li ta nangekwa pambelewa okuninga Omupresidente.
Oye omukainhu wotete a ninga omupresidente waNamibia noku li omupresidente omutitano.
Ovaleli va dja kondje yoshilongo okwa li va fika moNamibia okukala poshivilo shenangeko shOmupresidente Nandi-Ndaitwah.
Ovanhu okwa li ve na okudimbulukila efiku lemanguluko kokapale komaudano moWindhoek ashike omolwodula oyo kwa li tai loko unene koshilandopangelo, oshivilo osha ka ningilwa keumbo lepangelo.
Ovakainhu okwa li tava kuwilile nokudana va hafa moshili eshi omukainhu mukwao Nandi-Ndaitwah a ninga omupresidente.
Omupresidente okwa ti ota ka kwashipaleka kutya omunhu keshe oku li popepi nomayakulo opaunamiti.
“Onda hala oshiwana shi kale tashi mono omayakulo opaunamiti pehe na omunhu ta ende oshinano shile oku ya koipangelo,” ta ti.
Okwa ti ota twikile nokuxwaxwameka oufikepamwe moshilongo ngeenge tashi ya moilonga pokati kovakainhu novalumenhu.
“Pamwe neeminista dange dipe odo nda ulika ohatu ka tota po eepolongalama dounamapya dovanyasha opo va dule okulwifa ondjala noluhepo nokueta po eemhito doilonga,” ta ti.
Okwa weda po ta ti pefimbo talele oshilongo ota ka kondjifa onghalo yokuhe na oilonga unene tuu kovanyasha va dja koiputudilo yopombada.
Nandi-Ndaitwah okwa ti ovanhu otava kakala ve na eemhito dokutota po eengeshefa davo tashi pitile mokumona omikuli ta dilile kepangelo.
“Ohandi ka yambula po oshikondo shomaudano moshilongo ngaashi okutunga oupale voshinanena. Osha fimana ngeenge ovanyasha
tava longifa ounongo wavo okukufa ombinga momaudano,” ta ti.
Omupresidente okwa ti ota twikile okukala e na oukumwe nelongelokumwe novawiliki koilongo ya yooloka opo shi yandje omhito domangeshefelo.
Okwa pula Ovanamibia opo va twikile okulongela kumwe, okukala nombili molwashi oshilongo paife osha manguluka.