Omupresidente Netumbo Nandi-Ndaitwah Etiyali sho kwa ningwa omutumba gwotango gwopashigwana okwa kumagindha aaleli aape ya longe ya ikwatelela komisindalandu dha tulwa po osho wo ya longe pauyuuki noneitulemo.

“Iilonga nayi longwe ngaashi yi na okulongwa, pauyuuki nelalakano lyokugwanitha po shoka mwa pulwa koshigwana. Itapu gandjwa nando ompito yokudhengela ondhi peho, pokati kaamba ya gandja iilonga naamboka taye i pewa,” ta popi ngaaka.    

Nandi-Ndaitwah okwa ti aaleli oya pewa iilonga ye na oku yi gwanitha po koshigwana shaNamibia, onkene ota tsu aaleli omukumo ya longe nuuyuuki opo ya gwanithe po ayihe, yo yaa ndope.

Omupresidente ta popi kutya okwa hogololola aaleli mboka e na omukumo muyo kutya otaya vulu okulonga nokugwanitha po omauvaneko ya ningi pethimbo lyiigongi yoSwapo omumvo gwa zi ko.

“Onkene pakukala momutumba nguka gwopashigwana otashi ulike kutya oya zimine nokwiitaala kutya otaya ka gwanitha po ashihe oshigwana sha hala naashoka shi li mondjila okuhumitha komeho oshilongo shika,” ta popi ngaaka.

Nandi-daitwah okwa gwedha ko kutya aaleli aape naya longe yi ikwatelela kenyolwambo lyokabinete, ndyoka lya totha mo omilandu adhihe nkene ayihe yi na okugwanithwapo moshilongo.

Okwa kumagidha wo minista e na sha nuuministeli wuunamapya a nkondopaleke uunamapya nokukwashilipaleka kutya oshigwana otashi eta po iikulya moshilongo.  

Ta gwedha po ta ti, uuministeli wuuhaku nau kwashilipaleke kutya kehe Omunamibia ota vulu okumona uuhaku moshilongo.

 “Uuministeli wiikwamina nau longe neyitulemo opo ku gandjwe iilonga moshigwana osho wo okuyambidhidha oshigwana okumona ko oshipambu kuushitwe,” ta ti ngaaka.

Okwa thindi wo omuthindo kutya oshigwana oshi li mompumbwe yiilonga nomalukalwa onkene uupyakadhi mboka owa pumbwa okukandulwa po. -vkaapanda@nepc.com.na