Ovengi mba isanewa, ovaṱiṱi mba toororwa. Tjingetjo okambumba kovakambure omba karere pongumbiro yokomurungu wovita Osondaha poruveze rovitjitwa rwOmihoko Omikutasane ndu tjiukwa kutja OUN Plaza mOkatutura.
Okuningira ondaya kovitjitwa vyOmazemburukiro wEyuva rOtjiṱiro Otjindjandja.
Otja kouṱiṱ nounyaṋu wawo va wondjere amave nyondoroka, eyuva tji mari hiti tjandje ovihavero mbyari kamwaha vya hara ovandu. Tjandje nao imba ovatenga otja tji ku za: “onḓera ondenga ondji toora etiva” tjandje etiva ndi va toora. Ndiri ondaya yovaṱi novakuru. Otjiungura tji tja ri nOmuhonge omunene wOrusuuo, Jaanda Katoore, tja utire nOmbara Onene Tjinaaṋi Maharero, ngwa yakurire okambumba kovakambure novanambepo pekepeke tjinene vozombongo zotukwise ozo nḓe wira kehi yehika razo indi Onamibia Christian Apostles and Prophets Association, ousupi Onacapa kehi yomuṱize waro Omuhonge omunene Theo Pura wOSt Joel Apostolic Healing Mission Church in Afrika.
Momambo nga reserwe i yOmuhonge omunene Mbanongovandu Mungendje wOrusuuo, yari Epsalme indi o-21. Ongurova otja tji mai kurupa ovakambure otji va yendere amave nyondorokere metuwo, muwo mwari Ombara ya Maruru, Meundju Manasse Zeraeua. Tjandje wina ozondekurona zOngwena zeri kwamba kongurova yongumbiro muwo mu mwari umwe vovapendure mOngwena vombepo yokupaha otjisuta nokaṋepo okakuru kOmbongarero yOtjiwaṋa, Omuheṋendu Ida Hoffmann. Ongurova ya patere nomayakisiro womamunine wonḓura.
Owo ngari aya tyewa kokutja auhe ngu naro okuzambo ma twaerere koye na kare ame riyakisa ongurova aihe ngandu Oritjavari omazemburukiro wombura tji ye ya kotjikoro. Ozombongo za raisire kokutja auhe muzo u nombara ye ndje kongorera posi ya okatenda kOtjiṱiro Otjindjandja tji ka tono otja nai tji katonene meyuva romazemburukiro watjo, ozo za wana motjiṱo hi kaparukaze.
Omazemburukiro wEyuva rOtjiṱiro Otjindjandja yeri kehi yembo ehongonekwa ndi mari tja: “Okukunguna ko 2025, ndjeri ombura Oruuano rwa Afrika, ousupi OAU, ndwa zikamisa kokutja o-2025 ombura yOtjisuta tjOvaafrika na mba zirire mOafrika.
Kakutja nai wina Otjiṱiro Otjindjandja tjOvaherero nOvakwena tjingetjo tja kutwa ku nondjuriro yOvaafrika avehe mba huurirwe ngandu tjiva vawo mba kamburirwe nave randisiwa komahi wOkongurova otjovakarere.