Charles Ndeumane
Kansela gwoshikandjohogololo shaNdobe moshitopolwa shaHangwena Helaria Ndjuluwa okwa toto po opoloyeka yokupalutha aakalimo yomoshikandjohogololo she, ta pe aakalimo yomoshikandjohogololo she iilya yomahangu.
Kansela Ndjuluwa okwa toto po opoloyeka yokupalutha aakalimo yomoshikandjohogololo shaNdobe tayi ithanwa Naungungulu Novana ndjoka ya tulwa miilonga muJuuli omumvo. Opoloyeka ohayi gongele iilya yomahangu nomayambidhidho ga yooloka okuza kaayiyambi yo tayi topolele aakalimo yomoshikandjohogololo shaNdobe.
Ndjuluwa okwa ti okwe ya po nedhiladhilo ndyoka oshoka okwa koneke oshikukuta nondjala ndjoka yi li ko nuumvo, ta ti ina hala aantu moshikandjohogololo she taya si nenge taya nkundipala kondjala. “Opoloyeka ndjika oya patululwa momasiku 26 Juni 2024 komupeviminista gwuunamapya nuuniimuna Anna Shiweda. Elalakano lyopoloyeka ndjika inatu hala nande omuntu gumwe ta si ondjala moshikandjohogololo shaNdobe, inatu hala omuntu ta kanitha omadhiladhilo molwondjala, oshowo inatu hala nande omuntu ta si nenge ta nkundipala molwondjala”.
“Iigandhi oya tameka nale okuliwa, otwa gandja iilya piipangelo yetu itatu mbyoka yi li moshikandjohogololo shaNdobe, okakilinika kaShandi, okakilinika kaHamukukoto Wakapa, oshowo okakilinika kaNdobe. Otwa li twa nyolele kookilinika ndhoka dhi tu pe omadhina nomwaalu gwaantu mboka ye na omanyutu, uunona naakuluntu. Kehe koshipangelo otwa pewa ko aantu ye li 10 mboka twa pe kehe gumwe olata yimwe yiilya mEtitatu lya zi ko. Kumwe otwa gandja oolata dhi li 30,” osho Ndjuluwa a ti.
Omukalimo gwomomukunda Oshandi moshikandjohogololo shaNdobe Faustinia Kafita ngoka naye a pewa olata yiilya okwa ti edhiladhilo lyakansela ndyoka ewanawa lela notashi kwathele unene.
“Ngame onda pewa iilya oshoka ondi na okatekulu kandje ke na oshiviha shi li pevi unene.
Otashi kwathele lela oshoka paife ohandi ka ningile ontaku nokatete komahangu kehe esiku. Mpoka pwa ya kashona oshi vule mpoka inaapu ya nande osha,” Kafita ta tumbula.