Taimi Haihambo

Ondjibololo oyo ya li ya tungwa koshana shIiheke yaNakele moshikandjohoololo shaKatana kepangelo, vati otai ka longululwa opo ovakalimo va twikile okulonga eengeshefa davo nelitulemo.

Edi oda popiwa kungoloneya woshitukulwa shaShana, Hofni Iipinge konima eshi va li va talela po ovanageshefa vomangeshefelo opedu ovahongi voiyuma vo naminista wounamapya, omeva nomadu Selma Ashipala-Musavyi.

Oshana shIiheke yaNakele oshana osho sha didilikwa koshitopolwa shanooli, osho shi na edu lokuhonga oiyuma monooli aishe.

Molwefimano lasho linene, epangelo ola li la kufa ombinga opo li tunge po ondjibololo poshana opo, i kale hai longifwa kwaava hava me oiyuma yomaludi el ili nokulili.

Konima nee yeedula donhumba vati, ondjibololo oya ka enda tai loloka ndele tai tekapo.

“Paife ovanhu ohava hongele ashike oiyuma yavo komaumbo,” Iipinge ta ti.

Okwa ti ohashi kala shidjuu shaashi osha ningila ovakalimo oilonga yavo idjuu, unene tuu okututa edu lo olidjuu. 

Paife naava kwa li hava yandje eetundi dokuhonga oiyuma kounona voukadona, ihave shi ningi vali shaashi kavana apa tava longelwa. “Ashike nande ongaho, natango ovanhu ovatulamo lela eenghono mokulonga oiyuma yavo, shaashi natango oko ngaho hava kala koshana tava landifa oiyuma yavo ei vama,” Iipinge ta ti. 

Okwa ti ota ka fya oshisho opo ondjibololo i kale ya longwa nawa, vo ovakwashiwana va twikile okulonga noupu.

-taimihaihambo@gmail.com