Charles Ndeumane
OUTAPI – Omumati omugundjuka omukalimo gwomondoolopa yOutapi ota ti okwa tidhwa mosikola molwaashoka ke na onzapo yevalo nuuthemba wulwe woshilongo mboka wa li wa pumbiwa opo a nyole omakonakono gondondo onti-11.
Markus Ndeshitila omukalimo mOutapi ota ti okwa li mondondo onti-11 kosikola yaDavid Sheehama Secondary School manga inaa tidhwa mosikola omumvo 2023.
Anuwa yina yaNdeshitila omukwashigwana gwaAngola ndele he Omunamibia ashike okwa kala koSouth Africa hoka a yi manga Ndeshitila a li okahanona onkene kapu na ngoka e mu ningile uuthemba. Ndeshitila okwa kala metonatelo lyahekulu Abisai Heita kOutapi, okuza sho a li e na omimvo ntano. Heita okwa tamekitha Ndeshitila pOmbandjele Combined School mpoka a sikola sigo ondondo ontimugoyi.
Okwa taambwa koDavid Sheehama Secondary School hoka a sikola okuza ondondo 10 sigo ondondo 11 moshikako shotango. Anuwa uupyakadhi owe ke ya sho ethimbo lyokwiinyolitha a shange ekonakono lyopashigwana lyondondo 11 lya thiki, anuwa okwa tidhwa mosikola oshoka ke na onzapo yevalo.
“He nkene a ya nale koSouth Africa manga Markus a li peke ndele sigo onena inatu mu mona. Otwa kambadhala okuninga ekwatathano naye opo tu ningile okanona uuthemba, ashike oonkambadhala dhetu odha hulile muunyengwi, nangashingeyi katu na we ekwatathano naye. Yina yaMarkus omukwashigwana gwaAngola, kehe ethimbo tatu yi kombelewa yiikwameni oha tu shunithwa ko ashike tatu pulwa omikanda dhayina ndhoka anuwa dha pumbwa okuza koAngola,” Heita ta ti.
Heita okwa ti Ndeshitila okwa piyaganekwa nayi ketidho mosikola, nomaihumbato ge otaga lunduluka. “Mongashingeyi Markus okwa pewa egeelo lyokoopaleka posasiyona yopolisi mOutapi uule womwedhi aguhe molwaashoka a yaka iikutu mondoolopa.
Nkene a tidhilwe mosikola ke na we sha sha simana okulonga onkene okukala pevi otashi mu piyaganeke, sho osho ta shi etitha a ninge omatokolo omawinayi ga tya ngaaka,” osho Heita a popi ngaaka.
Sho a pulwa a tye ko sha koshinima shoka omukuluntuwiliki muuministeli welongo Sanet Steenkamp okwa ti oye ashike e na uuthemba wokutidha omunasikola mosikola ashike ina tidha Markus mosikola. “Oveta yuuministeli welongo inayi pitika omulongwa a tidhwe mosikola shaashi kee na uuthemba.
Uuthemba ohawu pulwa pethimbo lyokwiinyolithila omakonakono ashike ngele omulongwa ke na uuthemba mboka tawu pulwa andola okwa nigni ashike egano kopolisi ndele ta pewa ombapila ndjoka ta vulu okwiinyolitha nayo opo a shange omakonakono,” Steenkamp ta ti.
Omukuluntusikola gwosikola yaDavid Sheehama Fredrick Ngifinwa okwa ti ehokololo lyaNdeshitila inali ihwa po nenge ka li na uukwashili oshoka anuwa osikola inayi mu tidha.
“Onda kwatathana noshikondo shokunyolitha omakonakono ashike oya ti itaya dhimbulukwa ya shunitha ko omulongwa shaashi kee na uuthemba. Oveta yelongo inayi shi pitika. Osikola yetu kayi shiwo kutya omolwashike Markus a hulitha po okuya kosikola,” osho Nghifinwa a ti.
-mrndeumaneraycharles@gmail.com