Taimi Haihambo 

ONGWEDIVA – Ndinelao Haipinge omunamido 22, okwa ti ye oku li modula yaxuuninwa, omo te lihongele ouhongifikola, ashike ondjodi yaye ngeno okukala omumwenyekji woivilo, eshi hashi ufanawa “masters of ceremony” melaka loshitakumi. 

Haipige okwa ti ye mwene opo a shikule ondjila yoku mwenyeka oivilo, vati omolwohamu yovanhu yopaushitwe ei a didilika muye. 

“Ondi hole ovanhu neenghno, nonda didilika kutya mbela ngeenge va ongala, ame handi tameke oku va mwenyaka otashi ka enda nawa ngahelipi,” ta ti. 

Odula imwe vati manga a li e ke lideula kuyimwe yomeefikola, ofikola vati oya li i na oshitufi, nokwa li a pewa oshinakuwanifa shokumwenyeka oshivilo. 

“Eshi nda kwata okambako oko tete momakake ange okwa li nda hafa neenghono, novanhu ava va li ve ya koshivilo shokulihafifa eshi kwa li handi mwenyeke, ova li lela ve udite ehafo, po opo nee nda mona kutya, ohandi dulu okuya kokule,” ta ti. 

Okwa twikila kutya ngeenge tashi ya pokumwenyeka oivilo opo ngaho te ya mowela, osho shi li eshongo lakula kuye. 

“Ehalo neenghono dokukala handi mweyeke oivilo ihapu opo li li, ashike shaashi opo handiya mowela, vo vahapu kave shi nge nawa natango, vamwe ohava kala va fya ounye,” ta ti. 

Okwa yelifa kutya eshi ihashi mu teya nande omukumo, shaashi ye keshe apa a hetekela okuulika oshitalendi shaye oha fiye ovanhu tave limemesha alushe. 

Okwa twikila kutya ondjodi yaye ngeno meedula dokomesho okukala ha ifanwa a mwenyeke oivilo yakula ngaashi oMiss Namibia, eehango osho yo oivilo ya yooloka. 

Haipinge okwa ti nopaife oha kala amanguluka efimbo keshe okumwenyeka oivilo. 

-taimihaihambo2000@gmail.com